Så langt negativ til framhald på Evjo
Jan Mo AS meiner ein ny dispensasjon på Evjo i Øystese ikkje vil setja intensjonen med kommuneplanen vesentleg til sides. Rådmannen er ikkje einig.
Den 20. januar sende rådmannen dispensasjonssøknaden frå Jan Mo om lagring av mellom anna grus og parkering av tilhengarar på Evjo på høyring til Statsforvaltaren i Vestland og Vestland fylkeskommune.
Føresegnene i kommuneplanen seier mellom anna at parkering og vegar kan vera del av næringsformålet. Det står òg at områda ikkje skal nyttast til næring som fører til støy og støvplager for omgjevnadane, som til dømes entreprenørverksemd og lagring av grus og steinmassar.
Rådmannen meiner både parkering utanom regulert parkeringsareal og deponiet set intensjonen med kommuneplanen vesentleg til side. Den førebelse konklusjonen er at søknaden oppfyller vilkåra for korkje mellombels eller permanent dispensasjon. Jan Mo meiner fordelane er større enn ulempene. Dette tek rådmannen ikkje stilling til.
I vurderinga har rådmannen lagt vekt på merknadane frå naboane, som melde om mellom anna støv og støyplager. Fylgjene er svært uheldige for omgjevnadene om deponiet skal liggja der i ytterlegare tre år, står det i vurderinga.
Rådmannen la òg vekt på planutvalet sitt vedtak frå 2021. Når saka har vore på høyring, vil ho verta lagd fram for utvalet igjen.
