Sa ja til å vurdera nasjonalpark i Samnanger
Medan kvemmingane enno ikkje har drøfta saka, gav samningane allereie i juni støtte til å greia ut nasjonalpark.
Kommunestyret vedtok 16. juni at det er lokal aksept for å setja i gang arbeidet med verneprosessen, der fyrste steg er å greia ut konsekvensane av parken.
Ein del av den skisserte parken ligg i Samnanger, nærare bestemt område i nærleiken av Øvsta og Nedsta Dukavatn.
Vedtaket var i tråd med tilrådinga frå rådmannen, som påpeika at aksepten ikkje bind kommunen til å gje endeleg aksept for vern.
– Kommunen bør fylgja Statsforvaltaren si tilråding og avventa endeleg avgjerd om lokal aksept for vern til eit verneforslag er utgreidd og konsekvensar av eit eventuelt vern er vurdert, skreiv rådmannen i saksutgreinga.
I Kvam kom det sterke meiningasr til uttrykk i eit folkemøte i september. Saka skapa derimot minimalt med ordskifte då naturutvalet og kommunestyret i Samnanger handsama henne før sommaren. Linda Haug Kollbotn (Frp) spurde korleis grunneigarane stiller seg, men fekk tilbakemelding om at dei vil få rikeleg høve til å uttala seg i verneprosessen. Ordførar Knut Harald Frøland (Bygdalista) framheva at kommunen kan stemma ned nasjonalparken seinare, og at det såleis er knytt liten risiko til å støtta oppstart av verneprosessen.
Ordførar Torgeir Næss (Ap) i Kvam opplyser at saka truleg ikkje kjem til politisk handsaming før etter nyttår. Årsaka er at det er mange saker på saklista før jul, og at saka hastar siden vinteren uansett gjer feltarbeid i samband med konsekvensutgreiinga uaktuelt, opplyser ordføraren.
Heller ikkje Vaksdal kommune har handsama saka enno.
Les også:
