– Rykte tilbake til start
Hardangerbadet AS (HB) reknar med eit tap på om lag 2,5 millionar i 2021. Resultatet ser betre ut enn venta, ifylge dagleg leiar.
Verksemda har difor søkt den kommunale kompensasjonsordninga i Kvam herad om 850.000 kroner i vederlag for året.
I søknaden skriv dagleg leiar Anita Storemark at HB møtte store utfordringar med etableringa av ny bedrift då samfunnet stengde ned. Ifylgje henne kom om lag halvparten av gjestene tilbake ved oppstart for kvar gong bedrifta vart tvinga til å stengja.
— Det har gjeve tre halveringsrundar som korkje HB eller Kvam har råd til, skriv Storemark.
Pandemien stogga store delar av næringslivet i over eitt år.
— Me vart nullstilte, rykte tilbake til start og må byrja på nytt i eit samfunn med nye haldningar, ynske og behov. Samvær med dei me er glad i betyr mykje for menneska i åra framover, skriv den daglege leiaren.
Sjølv om samfunnet er opna att, heng konsekvensane att og vil gjera det i lang tid, meiner ho.
For å halda sørvis og tryggleik på topp, må ein ha nok kvalifisert mannskap på dekk. Det, i tillegg til kompetanseheving og innkjøp av utstyr og attraksjonar, vil krevja for mykje av ei bedrift som allereie har økonomiske utfordringar, meiner Storemark.
Ei misforståing førte til at det i den fyrste versjonen av denne saka stod at Hardangerbadet AS rekna med eit tap på 5 millionar kroner i 2021. Det stemmer ikkje. HF bed om orsaking for feilen.
