Ryggpasientar får koma tilbake

HH fekk løyve frå heradet og Statsforvaltaren til å avvikla behandlinga, men då hadde ein allereie kansellert henne på grunn av uvissa kring smittevernetiltak. Behandlinga vart difor utsett til veke 10, opplyser Sissel Aase Børve, assisterande dagleg leiar i HH.

– Me kunne ikkje gje ny beskjed fredag ettermiddag, så tett på. Men alt ligg til rette for at me kan arrangera behandlinga framover, seier dagleg leiar Janiche Buanes Heltne.

På grunn av koronapandemien kan ein berre arrangera behandling for åtte personar om gongen. HH vil leiga ein sal i Hardangerfjord Hotell for å kunna ha to meter avstand mellom alle involverte i ryggruppa. Ein får ikkje nytta lokala til HH, opplyser Heltne.

Opplegget er eit konsentrert behandlingsformat som inneber mellom anna fysisk aktivitet. Ein klinisk ernæringsfysiolog skal vera til stades, og ein psykolog. Ein fylgjer «Glad rygg»-konseptet, som opphavleg er dansk. Det inneber konsentrert trening hjå HH og åtte veker med opptrening i ettertid hjå ein fysioterapeut der helsegjestene bur. Tre fysioterapeutar i Kvam har fått opplæring i Glad rygg av fagfolk frå det Syd-Danske universitetet.

HH, som er eit non-profit aksjeselskap, betalar for behandlinga.

– Me har ei komplisert finansiering der det er stort sett forskingsmidlar og gåver på inntektssida. Me har inne fleire søknader no, både om forskingsmidlar og prosjektmidlar. Ein har søkt Forskingsrådet og Helsedirektoratet, seier Børve.

Helsegjestene kjem frå heile Vestland. Kurset går frå tysdag til fredag. Det har vore ein presentasjonsdag før, og så skal dei koma att i desse dagar.