Rydda i fjorden: – Me finn alltid mykje

Fredag la styremedlem i Os Dykkeklubb, Jan Erik Moss Soltveit, ut ei melding på Facebook-gruppa Kvardagsprat i Kvam om at det skulle dykkast i Hardangerfjorden. Prosjektet heiter Miljødykk Hardanger 2024, og er i regi av Norges Dykkeforbund (NDF). Ifølgje nettsida til NDF er målet å fjerna mest mogleg avfall frå sjøen, i tillegg til å formidla kunnskap om marin forsøpling til samfunnet. Moss Soltveit er ansvarleg for miljødykka Os Dykkeklubb deltek i.

Dykkarane hadde base ved gjestehamna i Norheimsund sentrum. Trass eit tjukt skoddehav over Hardangerfjorden var dykkarbåtar, kranar og mannskap i full sving med å fjerna avfall frå havbotnen. Dei dykka og rydda rundt Øykalven – også kalla Tjuvaholmen – og Kvamsøy. Dei var òg inne ved enkelte punkt langs kystlina ved Rykkje. Siste dykk skulle gå føre seg i Vikøy-området.

Avfallshaug til nytte

Då HF vitja hamna i Norheimsund laurdag ettermiddag, kom store mengder med avfall langs kaien til syne. Skrog, påhengsmotor, garn, fiskereiskap og fleire par med dekk pryda avfallshaugen. Dei som spaserte forbi, stoppa, tok bilete og prata med kvarandre om det dei såg.

Funna i Hardangerfjorden overraskar diverre ikkje Moss Soltveit.

– Me finn alltid mykje avfall. Dersom avfallet er ute av syne, er det ute av sinnet òg. Dette handlar om haldningar, seier Moss Soltveit.

Å leggja avfallet på kaien i Norheimsund var gjennomtenkt, fortel Soltveit. Han opplyser vidare at det er viktig avfallet kjem til syne for lokalbefolkninga. Det kan bidra til ei endring av haldninga til å dumpa avfall i sjøen, påpeika han.

Mykje å rydda opp i

Også Kenneth Bruvik, styreleiar i Framtidshavet, var med på aksjonen. Torsdag skipa han og Framtidshavet til arrangementet Rein Hardangerfjord 2024. Laurdag deltok han i dykkarbåtane saman med delar av mannskapet. Han var blant anna med på å sleppa laus ein stor krabbe som hadde vikla seg inn i ei gamal fiskefelle på havbotnen. Hadde dei ikkje funne krabben, ville han døydd og vorte agn for fleire artar, som truleg ville ha lide same lagnad, fortel Bruvik.

Leiar og ryddeansvarleg i Søgne Dykkerklubb, Karl Klungland, fortel at dykkarane hadde henta opp 55 fiskereiskapar frå sjøbotnen før det siste dykket skulle gjennomførast. Han opplyser at avfallsmengda ikkje skil seg frå mengda i andre delar av landet. Klungland påpeikar at det var stort etterslep på ryddinga i Hardangerfjorden. Han etterlyser meir regulering av bruk av fiskereiskapar.

– Mykje av det utstyret me finn på havbotnen, viser teikn til dårleg handtering. Det burde vore eit regelverk for å fiska med reiskap. Til dømes ein jegerprøve som dreiar seg om fiske med reiskap, seier Klungland.

– Naudsynt med endring

Bruvik og Soltveit er samde om at det er viktig at ryddeaksjonen er synleg. Hadde det vore opp til dei, hadde avfallshaugen fått liggja på kaien ei stund til. Årsaka er at han kan gje innbyggjarane ein vekkjar.

Begge ynskjer å halda fram med ryddeaksjonane. Dei er samde om at arbeidet er meiningsfullt og effektivt.

– Eg vonar ein aksjon som dette kan bidra til ei haldningsendring i samfunnet. Det er naudsynt, seier Soltveit.