Rosar redningsmannskapa
Dei pårørande takkar redningsmannskapa for innsatsen etter ulukka i Tokagjelet 24. oktober i fjor.
Advokat Einar Drægebø i Harris Advokatfirma AS i Bergen takkar på vegner av dei etterlatne etter Ruth Wathne, Nils Johan Bårdsen og Kjell Arne Pedersen.
I eit straumbrev til brannsjef Torleif Ones i Kvam herad skriv han at både i den innleiande redningsfasen og det som seinare vart til eit søk etter omkomne, gjorde redningsmannskapa frå fleire instansar og etatar ein svært god jobb under krevjande tilhøve.
Kvam brann og redning, i samarbeid med Vest politidistrikt, hadde ei leiande og koordinerande rolle i redningsarbeidet og søket. I søkjefasen var USAR-gruppa frå Bergen brannvesen ein sentral og viktig ressurs for at dei omkomne vart funne og dei etterlatne kunne få ei grav å gå til.
På vegner av dei etterlatne takkar Drægebø brannsjefen for den trygge og gode faglege jobben. Dei etterlatne har i tillegg følt det godt å verta møtte med empati og omsorg i ei krevjande tid. Advokaten set pris på om brannsjefen vil overbringa ein takk til alle som deltok frå Kvam herad.
