Roleg påske for dei få frivillige

Sambandsleiar Frank Jacobsen i Norheimsund Røde Kors Hjelpekorps melder om ein roleg påske på Kvamskogen. Korpset har vore på i alt fire henteoppdrag i samband med skadar som vriding, strekk og kutt, i tillegg til at det deltok i ein leiteaksjon etter ein joggar i Fusa sundag.

Sundag kveld tok korpset ein runde for å sjå etter hund en Bonnie, som ifylgje BA har vore sakna sidan fyrverkeri vart skote opp, tradisjonen tru, på Kvamskogen laurdag kveld. Dyret var framleis borte måndag.

I Hamlagrø har det vore ein svært roleg påske, heilt utan skadar, for dei som har hatt vakt på lagshytta Dyrbu. Til gjengjeld har Øystese Røde Kors Hjelpekorps utført ein del transportoppdrag for hyttefolk, seier leiar André Bjørke. Den einaste skaden korpset har handtert, hende på Sjusete, fortel han. Observasjonane hans tyder på at folk har vist respekt for skredfaren.

Både Jacobsen og Bjørke har hatt sin dose med vakt i påsken. Dei melder om minkande rasfare utover i påskeveka, etter at det kom litt nysnø kring palmehelga. No som sola står på og temperaturen aukar, vil det koma til å gå ein del sjølvutløyste skred i dei bratte sidene. Det gjeld med andre ord framleis å vera både varsam og merksam.

Jacobsen og Bjørke seier det har vore nokså tungt å få folk til å stilla på vakt, og at mykje av lasta er fordelt på få personar. Som HF skreiv før påske, har det vore vanskeleg å rekruttera nye frivillige dei siste åra.

Jacobsen trur at fleire faktorar kan spela inn. Han meiner at dei som er med, gjerne brukar opp kreftene på å finansiera frivillig arbeid, og at det kan vera lite motiverande når ein er så få aktive at dei som har vakt, ikkje får høve til å gå noko særleg på ski i fint vêr. Samstundes er det gjerne roleg og lite som skjer, slik at det ikkje vert så stor aktivitet. I tillegg får medlemene i alle fall på Kvamskogen ein del kritikk for å køyra med skuter til dømes i skiløyper, påpeikar han. Slikt betrar kanskje ikkje motivasjonen.

– Me får mykje skryt, men ein del kjeft òg, konstaterer han.