Røde kors vil byggja ny hytte i Hamlagrø

Øystese Røde kors hjelpekorps (ØRH) vil fornya hytta Dyrbu i Hamlagrø, ifølgje eit skriv til heradet frå dagleg leiar i Kvammabygg AS, Arne Lunestad.Dagens hytte er lite tenleg for dagens bruk. Bruken av hytta har endra seg noko dei seinare åra, og er prega av korte opphald i samband med vakt eller aksjonar i fjellet. Det er bruk for ei hytte som krev lite vedlikehald, som er lett å ta i bruk for mange ulike personar, og som «alltid» er klar til bruk med kort responstid. I den nye kommuneplanen ligg hytta i eit område eigna til spreidde fritidsbustader.Lunestad er engasjert av hjelpekorpset for å bistå med prosjektering og byggjesøknad. Han skriv at det mest ynskjelege er å riva den eksisterande hytta og føra opp ei ny med noko større areal. Prosjektet er ikkje finansiert, men ein er avhengig av byggjeløyve for å søkja om ymse finansiering, skriv den daglege leiaren. Øystese Røde kors hjelpekorps driv primært tradisjonelt hjelpekorpsarbeid i Hamlagrø, ifølgje heimesida. Dette inneber vakter om vinteren på korpshytta for å bistå folk i fjellheimen. ØRH driv òg varetransport til hytter i aksjonsområdet.