Røde Kors åtvarar turfolk mot temperaturfall i haustferien

Haustmørke, snø og temperaturfall overraskar kvart år turfolk på haustferie. Røde Kors oppmodar folk til å planleggje godt.

– Kvart einaste år på denne tida ser vi at ivrige turfolk gløymer både lommelykt, varme klede, ekstra mat og anna «obligatorisk» innhald i dagstursekken, seier landsrådsleiar Jarle Bjørge Øverland i Røde Kors Hjelpekorps i ei pressemelding.

– Vi oppmodar alle til å planleggje sjølv enkle turar i skog og fjell godt, legg han til.

Frivillige i Røde Kors Hjelpekorps er i beredskap før haustferien. Dei minner om at varme og lyse kveldar no er erstatta med kulde og mørke, og i enkelte delar av landet også uventa snøfall.

Fredag utvida meteorologane snøvarselet til også å gjelde område frå Vestlandet og nordover.

– No ser vi eit tydeleg vêrskilje med kaldare vêr. Den første snøen har falle, og i fjellområde også i Sør-Noreg kan ein no bli overraska av bitande kulde og snø der ein for berre ei veke sidan gjekk i sommarklede, seier Øverland.

For å gjere turen tryggare for seg sjølv og turfølgjet rår han å pakke varme klede, mat og førstehjelpsutstyr. Sørgje for ekstra batterikapasitet til telefonen, og å seie frå om kvar ein skal gå.

Elgjakt fell også saman med haustferie i delar av landet. Derfor oppmodar Røde Kors til at ein kler seg i klede med sterke fargar. Sterke fargar kan også hjelpe redningsmannskap dersom du skulle vere så uheldig å ende opp i ein søk- eller redningsaksjon.

(©NPK)