Rodde til fiskeskjeret

Torsdag la to robåtar med sju unge og to godt vaksne fiskarar om bord ut frå Hardanger fartøyvernsenter. Dei to vaksne fiskarane var leiar Sjur Tarjei Fykse og fiskestellsutvalsleiar Torbjørn Toft i Øystese Jeger- og Fiskarlag. Turen var ein del av eit opplegg laget kallar introduksjonsfiske. Målet var å læra dei sju unge fiskarane å handtera robåt og fiskeutstyr.

Ole Aleksander Hauger var ein av dei sju ungdomane som var med på turen. Han hadde store forventingar då HF snakka med han før turen.

– Eg trur dette vert spanande og morosamt. Eg likar å fiska og har fiska mykje i Austevoll, for der har mormor hytte, fortel han.

– Trur du at du vert flinkare å fiska etter å ha vore med på dette?

– Ja, det trur eg. Eg håpar eg kjem til å læra nokre triks. Og så er det kjekt å bli kjend med fleire, seier han.

– Fremja fiskeglede

Fykse fortel at introduksjonsfiske er eit omgrep som kjem frå Norges Jeger- og Fiskerforbund. Forbundet oppmodar lokallaga om å invitera til arrangement som fremjar glede over å vera ute i naturen.

– Me vil at dei unge skal verta glade i å vera ute, vera på sjøen og fiska. På vegen skal me læra dei unge nokre knep om korleis ein fiskar og kvar det er lurt å leggja båten om ein vil ha fisk, seier han.

– Ein viktig del er å lære dei unge å handtera ein robåt. Me skal læra dei å andøva, skota og hamla. Dei unge i dag er vane med at små båtar nyttar påhengsmotor. Me ønskjer at dei skal ro, seier Toft.

– Får me fisk, får dei prøva å sløya fisken. Som så mange eldre ønskjer me at den oppveksande slekta skal verta interessert i det me sjølve tykkjer er kjekt, seier Fykse.

Fleire aktivitetar

Introduksjonsfiske er for unge mellom 10 og 14 år. Turen torsdag var den andre av tre. Den første var 11. april. Då møtte ingen opp. Den siste turen vert 2. mai.

Ifølgje Toft har laget arrangert liknande opplegg før, men det byrjar å verta nokre år sidan sist.

I tillegg til dei tre samlingane no er det planlagt tre nye i haust.

– Og i mellomtida kan det henda me inviterer til fiske til dømes i Fitjadalen. Er introduksjonsfiske noko folk likar, vert det truleg ein ny runde til neste år, seier Fykse.

Fiskarane fekk to fiskar – éin i kvar båt.