Robotane tok over i Jondal

Alle dei tre klassane på mellomtrinnet deltok med sine eigne robotar, laga av den populære, danske plastklossen.

Sjølve konkurransen går ut på at ein førehandsprogrammert robot skal gjennomføra ei rekkje oppgåver som er grunnlag for tildeling av poeng. Elevane har jobba lenge og hardt med prosjektet.

I tillegg til den praktiske delen skulle klassane presentera ein innovasjonsbit. Problemstillingane var varierte, som for mykje luft i Bamsemums-pakkane, transport av varer gjennom røyr i heile regionen og transport av blod med hjelp av drone.

Kjerneverdiar

Det var òg ei gruppe i kvar klasse som skulle ta føre seg kjerneverdiane i oppgåva. Noko av det viktigaste elevane skulle læra av konkurransen, var samhald, lagarbeid og å ha det moro.

Nokre av gruppene hadde drege det så langt at dei hadde vore att på skulen og øvd til seint på kveld tidlegare i veka. Klassane drog fram at det hadde gjeve godt samarbeid og styrkt venskap.

Nasjonal konkurranse

First Lego League er eit internasjonalt arrangement med fokus på mange læreplanmål og samhandling mellom elevane.

Elevane i Jondal hadde kvalifisering til den kommunale finalen i Odda. Vinnaren der går vidare til ein nasjonal finale i Ålesund. Der er det høve til å gå endå eit steg vidare til skandinaviske finalar.

Laget frå Jondal heiter Jondal Dragons. Både presentasjon av innovativt prosjekt, kjerneverdiane og den praktiske robotkøyringa tel når ein legg saman poenga. I den kommunale finalen i Odda er det 15 lag frå heile Ullensvang som deltek.

Nøgd med innsatsen

Lill Kristin Brekke og Karoline Nystøyl var domarar under den praktiske delen av oppgåva. Dei skrytte av alle elevane som hadde tileigna seg kompetanse om koding og teknologi på kort tid.

— De har vore svært flinke, sa Brekke då konkurransen var over.

Sjølv om det var nokre som drog det lengste strået og gjekk vidare til Odda, var alle elevane nøgde med det dei hadde fått til. Til stades var også representantar for lokale bedrifter som hadde sponsa kjøp av robotar til klassane. Dette gjorde til at endå fleire kunne prøva seg på den praktiske biten av oppgåva. Leiinga ved skulen var svært glad for at bedriftene ville støtta.

— Det var kjempekjekt, sa rektor Sarah Marie Røstbø.

Fekk løyve til snop

Presentasjonane frå innovasjonsbiten av tevlinga skulle vera relevant for årets tema, som var «Cargo connect». Mange av gruppene tok tak i lokale transportutfordringar, men ei gruppe valde å sjå på korleis ein kunne pakka godteri med mindre luft i posane. Og dei hadde vore nøgne i arbeidet. Gruppa hadde nemleg kome på døra til rektor Røstbø for å få pengar til å gå på Spar for å kjøpa inn snop å forska på.

— Og snop fekk me, smilte elevane.

Elevane forsikra dei frammøtte om at ingen bamsemums hadde gått til spille under utprøvinga, sjølv om det tidvis var freistande å ta ein smaksprøve. Etter tevlinga fekk alle elevane på mellomtrinnet servert pølser.

— Dei er attpåtil varme, lo ein munter rektor.