Robot skal omsetje munnlege stortingsinnlegg til nynorsk
Stortinget skal neste år ta i bruk teknologi som kan omsetje tale på dialekt til nynorsk.
Stortinget har valt å automatisere referatskrivinga frå stortingssalen med å bruke kunstig intelligens. Med hjelp av teknologi frå det danske selskapet Dictus skal alle talar og innlegg på Stortinget bli omsett til tekst, skriv Framtida.no.
No blir over tusen timar med lydopptak i stortingssalen brukt for å trene språkteknologien til å forstå norske dialektar. Dette vil òg bidra til utviklinga av ein nynorsk talegjenkjennar som skal bli tilgjengeleg for publikum i 2021.
Artikkelen held fram under annonsen.
– Det blir meir og meir bruk av taleteknologi i samfunnet, men førebels har nynorsk og dialekt hengt etter. Då er det veldig fint at vi snart kan få bruke dialekt og nynorsk med denne teknologien, seier Gunnhild Skjold, leiar i Norsk Målungdom, til Framtida.no.
Dictus har allereie utvikla tale til tekst-teknologi for Folketinget i Danmark.
