Ring på spring eskalerte
Torsdag kveld skal ei gruppe ungdommar ha trakassert ein familie med små born i Norheimsund.
Det opplyser politistasjonssjef Terje Sperrevik ved Kvam politistasjon.
Han fortel at det heile byrja då nokre ungdommar ringde på huset og sprang vekk tysdag kveld. I samband med dette skal mannen i huset ha teke tak i ein av dei unge.
– Me fekk først melding frå huseigaren om ring på spring klokka 20.30. Klokka 21 fekk me ei ny melding frå ein forelder som meiner huseigaren var for hardhendt med ein av ungdomane, fortel Sperrevik.
Onsdag kveld møtte ei gruppe ungdomar opp utanfor huset att, før det toppa seg torsdag kveld.
– Då skal mellom 30 og 50 ungdomar ha vore utanfor huset. Dei ringde på og sprang, oppførte seg skremmande og ropte ukvemsord. Fleire skal ha vore maskerte. Nokre ungdommar gjekk til angrep på kona i huset, seier Sperrevik.
Saka vert etterforska.
– Det tek litt tid, sidan mindreårige er involverte, men me prøver å få eit bilete av kva som har skjedd.
Sperrevik fortel at huseigaren hevdar å ha vorte plaga av ungdom i lang tid.
– Dei skal ha ringt på og sprunge med jamne mellomrom i fleire månader. Familien opplever dette som svært skremmande, og føler seg terroriserte. Slik oppførsel er totalt uakseptabel. Dette vil me ha slutt på, seier Sperrevik.
I ei transpondermelding til alle føresette ved Kvam ungdomsskule fredag skreiv rektor Kari Ljones at om lag femti elevar ved skulen var innblanda i det ho omtalar som ein valdsepisode. Fredag møtte både politiet og representantar for Kvam herad opp på skulen for å snakka med elevane om alvoret i situasjonen. Skulen oppmoda dei føresette om å passa ekstra godt på ungdomane i helga, og om å vera nysgjerrige på kva dei unge gjer og kven dei er saman med.
Har du tips om saka? Kontakt HF.
