Returnerer med brennaktuelt tema
Koronaviruset har gjort at kvinnedagsmarkeringa i Kvam har lege i dvale i to år. I år er markeringa attende med eit svært aktuelt tema.
Årets lokale markering handlar om kvinner og born i krig, skriv den lokale 8. mars-komiteen i ei pressemelding. Då komiteen valde tema, tenkte komiteen først og fremst på kvinner og born som sit fast i flyktningleirar nord i Syria. Krigen i Ukraina har derimot gjort at temaet brått vart meir aktuelt.
Krigen i Ukraina kom for brått på til at den har påverka programmet. Markeringa i amfisalen på Norheimsund skule byrjar med at syriske Syriske Nehad Alsehnawi, som bur i Kvam og jobbar med born, held innlegget Redd borna frå IS-ideologi. I innlegget vil ho mellom anna seia litt om kva det gjer med born å leva under regimet til IS.
Det neste innlegget står psykologspesialist Solfrid Raknes for. Det har fått tittelen Kan me hekla oss ein skule og spela oss til psykisk helse? I innlegget skal Raknes samla trådar mellom medsøstrer i Kvam og Bekaa.
Det tredje innlegget, Kvifor Noreg må henta heim dei norske borna i Syria?, står Gunvor Knag Fylkesnes for. Ho er direktør for politikk og samfunn i Redd Barna.
Dagen vert avslutta med at lokale politikarar og medlemer frå Kvam ungdomsråd går på scena. Vona er å få i gang ein samtale som kan gje svar på kvifor norske borgarar som sit fast i Syria, ikkje vert henta heim, og kva kvemmingane kan gjera for å finna ei løysing.
