Renevo AS kjem på franske hender
Selskapet som vil byggja biogassanlegg i Tryglavik i Jondal, vert i siste instans eigt av ein fransk investor.
Verksemda Gasnor AS, som sidan sommaren 2020 har eigt 50 prosent av føretaket Renevo AS, kjøpte 4. april dei resterande 50 prosentane gjennom ein opsjon som var del av kjøpsavtalen i 2020. Kjøpesummen er hemmeleg. Det går fram av ei pressemelding frå Gasnor og Renevo.
Ifylgje proff.no er Gasnor eigt av det norske selskapet Pegasus Midco AS, som er eigt av det norske selskapet Pegasus Topco AS. Pegasus Topco er ått av det spanske selskapet Molgas Energy Holding Sa, som igjen er eigt av det franske investeringsfondet Infravia Capital Partners. Vincent Levita er grunnleggjar og leiar av Infravia Capital Partners (ICP).
Eilef Stange vart dagleg leiar i Renevo frå 4. april 2023. Det har vore ei spanande reise for gründerane å etablera og utvikla Renevo, opplyser tidlegare aksjonær Jan Kåre Pedersen, som selde seg ut, men vil halda fram som rådgjevar i selskapet.
Gründerane hadde ein klar ambisjon om å bidra til etablering av nye, grøne arbeidsplassar og større tilgang på biogass. Renevo er i ein spanande vekstfase, skriv Gasnor. Ein er trygg på at Gasnor vil ta ut vekstpotensialet som ein del av si satsing på fornybar gass. Alt ligg til rette for ei viktig satsing på biogass i Noreg, og dei nye eigarane trur at Renevo kan bidra sterkt til dette, heiter det i pressemeldinga.
