Rekordvåt august

Ifylgje den klimatologiske månadsoversikta til Meteorologisk institutt var sommarsesongen på Vestlandet i år «ekstremt våt». Nokre av vêrstasjonane hadde dobbelt så mykje nedbør som normalt, står det i oversikta.

I oversikta for august kjem det fram at det vart registrert 30 prosent meir nedbør enn normalt i heile landet. For Vestlandet var det endå verre, med 75 prosent meir nedbør enn normalt. Sidan målingane starta i 1901, har det berre vore våtare august éin gong, og det var i 1929. Samnanger hadde det våtaste døgnet i august med 89,2 millimeter nedbør 10. august.

Normalen på Jonshøgdi målestasjon på Kvamskogen er 221 millimeter nedbør i august. I år vart det registrert 533,4 millimeter nedbør på målestasjonen.

– Det er den høgste målinga for den stasjonen sidan målingane starta i 2006, opplyser Helga Therese Tilley Tajet, klimaforskar hjå Meteorologisk institutt.

Den førre rekorden vart sett i 2019. Då baud august på 427,8 millimeter nedbør. Til samanlikning kom berre 220,1 millimeter nedbør i august i fjor.

På Kvamsøy kom det 312,8 millimeter førre månad. Det er 10 fleire millimeter enn rekorden på 302,6 millimeter frå 2019. I fjor kom det 153 millimeter nedbør i august, medan normalen er på 145. Målingane på Kvamsøy starta i 2005.

Så langt i september er det registrert 112,6 millimeter nedbør på Kvamskogen, medan det har regna 51,4 millimeter på Kvamsøy.

Temperaturen for august var heller ikkje noko å skryta av. På Kvamskogen var snittet 11,7 grader, som er 0,6 grader lågare enn normalen. Kvamsøy hadde i snitt 14,3 grader i august, medan normalen er 15,5 grader.