Rekordmange søkjarar
Norheimsund Friskule har opplevd ein markant auke i søkjetala for skuleåret 2024/2025. Det er ikkje berre positivt, synest rektor Brit Gjerde Voster.
Til skuleåret 2024/2025 er det ikkje berre fyrsteklassingar og tidlegare elevar som søkjer plass ved den private skulen. Størst pågang er det i 8. klasse, fortel Voster.
Det kan bety at elevane ikkje har det godt der dei kjem frå. Det synest ho er trist. På den andre sida er det godt at det finst alternativ, synest ho.
– Det er ikkje alltid optimalt med ein stor skule. Det passar ikkje for alle.
Søkjarane kjem frå Norheimsund, Øystese, Bergen og utlandet. Mange utanlandske foreldre, til dømes, er uroa over mangelen på respekt på andre skular, seier Voster.
Likevel trur ho at elevane kjem til skulen fordi bygda over tid har opplevd at skulen vert godt driven. Rektor fortel at elevane trivst og at resultat frå elevundersøkingar, nasjonale prøvar og eksamenar er gode.
– Me har mange nøgde heimar som har opplevd at borna deira har fått det mykje betre etter å ha kome til ein liten og oversiktleg skule, seier rektoren.
I skuleteljinga for inneverande skuleår, som gjekk føre seg 1. oktober i haust, talde skulen 42 elevar. I dag har skulen 48 elevar. Skulen er godkjend for 65 elevar. Alle plassane kan nyttast ut frå søkjartalet i år, fortel Voster. Om det vert gjort, er uvisst.
– Bygningsmassen er i knappaste laget, og me må på litt lengre sikt få nokre klasserom og grupperom til, seier rektoren.
Kva skulen skal gjera, og om noko skal gjerast før skulestart, vert diskutert i eit styremøte tysdag 5. mars.
Les også:
