Reiselivet i Hardanger ventar stor trafikkauke på riksveg

Ullensvang Reiseliv har fått utarbeidd ein ny trafikkanalyse for Riksveg 13 for å dokumentere den viktige transportfunksjonen vegen har. Analysen slår fast at ein kan vente opp mot 40 prosent trafikkauke fram mot 2030.

Trafikkanalysen er utarbeidd av Sivilingeniør Helge Hopen AS.

– Analysen slår tydeleg fast den viktige nasjonale og regionale transportfunksjonen, og underbyggjer dei store utfordringane med framkomst og trafikktryggleik med noverande vegstandard og trafikkmengd, heiter det i ei pressemelding frå Ullensvang Reiseliv.

Hovudbodskapen frå analysen er at det er venta sterk trafikkvekst framover, særleg på den nordlege delen mellom Kinsarvik og Bu. Mykje av veksten er venta å kome dei næraste 5–10 åra. Hovudårsaka til dette er at utbygginga av E16 og nedbetalinga av Hardangerbrua vil trekkje meir trafikk nordover.