– Reglar gjeld også for småbåtar

Det opplyser politioverbetjent Per Gunnar Thrane ved Kvam politistasjon. Politioverbetjenten seier til HF at kapteinen på MS «Epos», som går i rute mellom Øystese, Norheimsund og Rosendal i sommar, har meldt om det han opplever som farleg køyring på fjorden.

– Småbåtar rasar rundt den større båten og kjem ifylgje meldaren for tett på. Han er redd det skal skje ei ulukke, seier Thrane.

– Reglar gjeld også for småbåtar, minner han om.

Ein har eit visst ansvar når ein slepper ungdomar laus med båtar. Det er ikkje heilt ufarleg, seier Thrane, som vonar at føresette vil ta ein prat med ungdomane. Småbåtar har vikeplikt for nyttefartøy.

Maria Pile Svåsand er dagleg leiar i stiftinga Litteraturbåten Epos. Ho stadfestar at det er mange småbåtar å sjå rundt MS «Epos» på fjorden, og synest det er kjekt at ungdomane kosar seg på sjøen.

– Og eg skjønar at me lagar kjekke bylgjer, legg ho til.

Ho ber likevel ungdomane om å vera meir forsiktige og halda god avstand. Det som kan opplevast som god avstand, er ikkje alltid nok i nærleiken av ein stor båt, fortel ho.

– Me kan ikkje bråstoppa, og på veg til og frå kai er det mykje propellvatn som kan skapa vanskar for småbåtane. Heldigvis er det plass på fjorden til alle, seier Svåsand.

– Så kan me jo håpa at nokon av ungdomane veks opp til å verta skipper på «Epos», legg ho til.

Ifylgje Redningsselskapet kan born under 16 år køyra båtar med opptil 10 hestekrefter og ei maksimal lengd på 8 meter utan båtførarprov. Øvingskøyring er tillate i større båt, men då under tilsyn av førar, som har rett til å køyra båten.

Båtførarprøven kan takast frå fylte 14 år, men vert ikkje gjeven ut før fylte 16 år. Ei typisk ungdomsjolle med 9,9 hestekrefter vil vanlegvis kunna gå i opptil 17–18 knop.