Regjeringspartia og SV samde om straumstøtte til landbruket

Arbeidarpartiet, Senterpartiet og SV er samde om ei mellombels straumstøtteordning for landbruket.

Støtteordninga til jordbruks- og veksthusnæringa har som mål å utbetale støtte i andre halvdel av februar 2022.

Ordninga er basert på prinsippa i straumstøtteordninga for hushalda, men med eit vesentleg høgare tak for straumbruken for jordbruket og utan tak for veksthus, opplyser dei tre partia i ei pressemelding.

Viktig handslag

– Dette er eit viktig handslag til norske bønder og gartneri som står i ein vanskeleg situasjon på grunn av ekstremt høge straumprisar. Eg er òg svært glad for at vi finn ei løysing for 29.000 husstandar som stod i fare for å falle utanfor alle støtteordningar på straum, seier Arbeidarpartiets landbrukspolitiske talsperson Per Vidar Kjølmoen.

Forslaget inneber ei ekstraløyving på 500 millionar kroner. Totalt inneber ekstraordinære tiltak etter regjeringsskiftet auka løyving til jordbruket på om lag 1,5 milliardar kroner, inkludert ekstra løyving til investeringsstøtte.

Landbruksminister Sandra Borch (Sp) har tidlegare varsla at Landbruksdirektoratet tek sikte på å starte med utbetalingar mot slutten av februar. Bøndene skal ikkje søkje om støtte, men kompensasjon blir utbetalt basert på forbruksdata.

– For Senterpartiet er det viktig å sikre trygg mat basert på norske naturressursar. Derfor var det heilt nødvendig å få på plass ei støtteordning som avhjelper situasjonen for næringa, seier Senterpartiets Jenny Klinge.

Ingen bønder å miste

– Krisa i jordbruket handlar om meir enn straum, og med denne semja mellom SV og regjeringspartia legg Stortinget viktige føringar for arbeidet med både kompensasjon og jordbruksforhandlingar, og det har det vore viktig for SV å få på plass, seier Torgeir Knag Fylkesnes, næringspolitisk talsperson og nestleiar i SV, til NTB.

– Avtalen er klar på at den ekstraordinære kostnadsveksten ikkje skal føre til forfall i jordbruket. Vi har ingen bønder å miste, ingen matproduksjon å tape, seier han.

Venstre er likevel skuffa over avtalen og peikar på at dei tre partia ikkje prioriterer straumstøtte til små og mellomstore bedrifter på lik linje med landbruket.

Gløymer småbedriftene

– SV har forhandla i to dagar med regjeringa om straumstøtta til landbruket, men fann ikkje ei einaste krone til den delen av næringslivet som no treng hjelp. Det vitnar om ei regjering som ikkje forstår andre små- og mellomstore bedrifter enn landbruket, og kva utfordringar dei no står overfor, seier Alfred Bjørlo, Venstres medlem i næringskomiteen.

Det var i midten av januar at det vart semje om å komme bøndene i møte med ei straumstøtteordning. Deretter vart forslaget send til behandling i næringskomiteen på Stortinget etter at regjeringa i statsråd 28. januar la fram ein proposisjon.

Torsdag leverer komiteen innstillinga, og deretter skal forslaget behandlast i Stortinget. Førebels dato for dette er sett til 15. februar.

(©NPK)