Regjeringa stansar lærarstreiken med tvungen lønnsnemnd
Lærarstreiken blir avslutta etter at regjeringa grip inn med tvungen lønnsnemnd.
Arbeidsminister Marte Mjøs Persen (Ap) kalla partane inn tysdag kveld. Etter eit kort møte vart det stadfesta at regjeringa grip inn.
Lærarane har streika sidan byrjinga av juni, men uttaket tok seg opp rundt skulestart i august. Konflikten mellom dei tre lærarorganisasjonen Utdanningsforbundet, Norsk Lektorlag og Skolenes landsforbund og motparten kommuneorganisasjonen KS har verka heilt fastlåst.
Artikkelen held fram under annonsen.
Rundt 8.500 medlemmer var i streik då regjeringa greip inn.
Uroa rundt korleis streiken ramma elevar har auka i styrke dei siste vekene. Mange elevar har ikkje hatt ordinær undervisning etter sommarferien. Mange har også vore bekymra over situasjonen til sårbare elevar, spesielt i etterkant av to år med pandemi.
Barneombodet har skrive brev til regjeringa, og det same har Foreldreutvalet for grunnskulen. Statsforvaltaren i Troms og Finnmark melde inn eit varsku tysdag, mellom anna fordi elevar stod utan tilbod om spesialundervisning.
Regjeringa har understreka at det har vore ansvaret til partane å finne fram til ei løysing. Seinast fredag kalla kunnskapsminister Tonje Brenna (Ap) inn lærarorganisasjonane og KS for å be om at det vart gjort nye forsøk på å semjast.
Partane møttest til samtalar hos riksmeklar Mats Ruland både laurdag og søndag, utan at det lykkast å finne fram til ei løysing.
