Regjeringa opnar for turistskatt i alle kommunar – kan ta avgift for overnatting
Regjeringa vil innføre ei ny ordning for turistskatt. Den blir open for alle kommunar, og dei kan ta inntil 5 prosent i avgift for overnatting.
– Vi har lagt vekt på at eit besøksbidrag skal omfatte alle former for overnatting, inkludert Airbnb, for at konkurransen mellom ulike former for overnattingstenester skal påverkast minst mogleg, seier næringsminister Cecilie Myrseth (Ap).
Tysdag er ho i Tromsø for å leggje fram eit nytt lovforslag som skal gjere det mogleg for alle kommunar å krevje inn turistskatt, også kalla besøksbidrag. Dette er eit av løfta frå Hurdalsplattforma.
Artikkelen held fram under annonsen.
– Eg er oppteken av at det må vere tillit mellom turistar og lokalbefolkning, og det kan det nye verktøyet bidra til. Besøksbidrag kan bidra til å finansiere fellesgoda som blir brukte av turistar og lokalbefolkning, seier Myrseth.
Maks 5 prosent av overnatting
Det skal vere frivillig for kommunane om dei vil innføre avgifta. Den skal krevjast inn i samband med overnatting, og kan maksimalt vere på 5 prosent av prisen for overnattinga, ifølgje lovforslaget. Forslaget skal no ut på høyring.
– Det skal vere nøkternt for kvar enkelt turist, samtidig som vi ønskjer å styrkje evna kommunane har til å ta imot besøkjande. Sjølv om bidraget for kvar enkelt ikkje er så stort, kan den totale summen bli stor for kommunane, seier Myrseth.
Forslaget gjeld hotell, campingplassar, bubilparkar, vandrarheimar, privatutleige, hotellskip, fritidsbåtar i gjestehamn og anna overnattingsverksemd, opplyser Næringsdepartementet.
Plattformselskap som Airbnb eller Finn.no får ansvar for å krevje inn og betale overnattingsavgifta i dei tilfella der dei handterer betalinga på vegner av utleigarar.
Skrotar pilotordning
Regjeringa ønskjer også å innføre ein turistskatt for cruiseturistar, men dette er enno ikkje klart.
– Cruiseturistar, som andre turistar, nyttar seg også av lokale fellesgode når dei går i land. Det er derfor naturleg at ein i neste steg greier ut eit besøksbidrag frå cruiseverksemd, med mål om å innføre dette, seier næringsministeren.
Tidlegare har regjeringa snakka om å først innføre eit pilotprosjekt for besøksbidrag i nokre kommunar i første omgang, men denne ideen har dei no skrota. Dei foreslår dermed altså ei ordning som blir open for alle kommunar.
Artikkelen held fram under annonsen.
– Regjeringa meiner at det hastar å få på plass løysingar som kan bidra til eit meir berekraftig reiseliv, skriv Næringsdepartementet i ei pressemelding.
(©NPK)
