Regjeringa hasteinnkallar til pressekonferanse – nye koronatiltak på veg

Koronasmitten og -innleggingane aukar raskt kvar dag. No kallar regjeringa inn til pressekonferanse, der dei vil leggje fram nye tiltak.

Statsminister Jonas Gahr Støre (Ap) og helseminister Ingvild Kjerkol vil vere til stades på pressekonferansen klokka 20 måndag kveld.

– Situasjonen er alvorleg. Smittespreiinga er for høg. Og vi er nøydde til å treffe tiltak for å avgrense den utviklinga, sa Støre til NTB tidlegare måndag.

Måndag var regjeringa i møte med Folkehelseinstituttet (FHI) og Helsedirektoratet, som begge har levert nye tilrådingar om ytterlegare koronatiltak for å få bukt med den stadig meir eskalerande situasjonen.

– Det hastar med å bremse covid-19-epidemien med betydelege tiltak slik at ikkje omikronvarianten forårsakar ei epidemibølgje som gir enorm sjukdomsbyrde og fullstendig overbelastar helsetenesta. Formålet er å redusere og flate ut denne bølgja, heiter det i ei ny risikovurdering frå FHI om omikronvarianten måndag.

Det har vorte sett ei rekkje smitterekordar dei siste dagane, både nasjonalt og i dei største byane. Innslagstala har òg nådd rekordhøgt nivå dei siste dagane. Måndag var 358 koronapasientar innlagde på norske sjukehus, som er det høgaste talet som er registrert hittil under pandemien.