– Regjeringa har ikkje prioritert kystfylka
Sp ønskjer betre tilbod og lågare prisar på ferjer og skyssbåtar.
Partiet har fremja eit forslag på Stortinget om å gjennomføra tiltak som skal redusera prisane, opplyser partiet i ei pressemelding.
– For folk langs kysten er ferja og båten like viktig som buss, trikk og t-bane er i Oslo. Difor kan me ikkje akseptera at vanlege familiar ikkje har råd til å koma seg på jobb, skule og fritidsaktivitetar på grunn av altfor høge båt- og ferjeprisar, seier stortingsrepresentant Nils T. Bjørke.
– Regjeringa har ikkje prioritert kystfylka, og prisauken for ferjene er eit resultat av dette. Regjeringa har pålagt fylka enorme investeringar i nye båtar og ferjer, utan å kompensera for det. Taparen blir folk langs kysten som må betala skyhøge billettprisar. Staten må på banen med pengar, slik at ein får lågare prisar for alle som er avhengige av sjøvegen i kvardagen, seier stortingsrepresentant Liv Signe Navarsete i Sp.
