Regionråd tek til orde for Helse i Hardanger

Som HF skreiv nyleg, er døra til «helsedelen» i Hardangerbadet-bygget stengd etter om lag fire år. Det skjedde etter at Helse i Hardanger AS (HH) ikkje nådde opp i kampen om rehabiliteringsoppdrag i Helse Vest. Dimed er den tredje høgda i bygget for tida praktisk tala livlaus.

Torgeir Næss (Ap) tok saka opp i Hardangerrådet i møtet på Tysnes fredag. Han fekk samrøystes støtte til ei fråsegn som vert send til helse- og omsorgskomiteen og hordalandsbenken på Stortinget.

Rådet ber regjeringa byrja med å setja av ti millionar kroner i revidert nasjonalbudsjett for å halda liv i prosjektsamarbeidet mellom HH og Helse Bergen. På lengre sikt bør styresmaktene vurdera om HH bør verta eit nasjonalt senter for innovasjon innan rehabilitering.

I fråsegna hevdar rådet at HH leverer tenester som fungerer og er kostnadseffektive, og at helsegevinsten til pasientane er varig. Regionrådet påpeikar at anbodsgrunnlaget til Helse Vest er tilpassa det tradisjonelle døgnprissystemet, ikkje ei intensiv behandling av det slaget HH har satsa på.

– Det er grunn til å stilla spørsmål ved korleis stoda er for helseinnovasjon når slikt skjer. Uansett – her går sola ned for eit prosjekt som svarar på notids- og framtidsutfordringar i helsevesenet. Oppskalert er dette svært ressurssparande, både økonomisk og ikkje minst personellmessig. Dette må me få hindra, heiter det i fråsegna.

Næss seier til HF at målet hans med initiativet er å få meir press bak kravet om å berga tilbodet. Han tok opp saka i møtet allereie i mars, då det nettopp hadde vorte kjent at HH stengde dørene.

– Trur du det er realistisk å få til noko i revidert nasjonalbudsjett?

– Det er verdt å prøva, og bør ikkje så uprøvd, seier Næss.

– Når går toget for å berga tilbodet?

– Det vil eg trur går når det kjem ein ny leigetakar i lokala.

Ordføraren opplyser at han drøfta saka med stortingsrepresentantane Truls Vasvik (Ap), Linda Merkesdal (Ap) og Hans Inge Myrvold (Sp) i eit digitalt møte måndag. Vasvik er nestleiar i helse- og omsorgskomiteen.

Dei tre fekk informasjon om HH, men kunne ikkje lova noko, fortel Næss. Noko av dilemmaet deira er at Helse Vest har ei uavhengig rolle og ikkje kan instruerast. Alternativet kan såleis vera det nemnde nasjonale senteret.