Redda dei døde frå flaum
— Det har lege som eit verkjande sår sidan flaumen hausten 2019. Det var berre flaks at det ikkje gjekk verre den gongen, seier Heine Ugletveit.
Ugletveit er ansvarleg for vedlikehaldet på kyrkjegarden i Vikøy. Hausten 2019, då ei rekkje vegar rasa ut under uvêr, gjekk det nesten gale også på kyrkjegarden.
— Det vart gjort ein feil for ein del år sidan, då elva vart lagd i ein sving. Det er ikkje alltid ei elv vert med på slikt. Ho prøver alltid å finna den enklaste vegen, seier Ugletveit.
No har han på eige initiativ flaumsikra kyrkjegarden så godt det lèt seg gjera, utan særleg budsjett. Han har ikkje fått gjort det heilt slik som han kunne ynskt. Då måtte han ha grave heilt ned i grunnen, og då kostar det fort mykje pengar.
— Det er kommunen sitt ansvar, men eg har gjort det no. Eg har maskin tilgjengeleg. Det viktigaste er at noko vert gjort, seier Ugletveit.
Han har sidan flaumen hatt i tankane at noko måtte gjerast. No hadde han fått samla opp litt stein og fann tida til det. Han har òg reinska lenger oppe i elva med den vesle gravemaskina.
— Eg såg at arbeid som var gjort lenger nede, allereie var vaska ut. Dette er ein slags «quick fix», men det held nok ei stund til. Det må i alle fall minst ein like stor flaum til for at det skal fara no, seier Ugletveit.
