Reagerer på vedtak

Parkeringslaget, som sidan 1977 har drive parkeringsplassen for hytteeigarar i området, er skeptisk til hytteplanane til hjelpekorpset. To lånte parkeringsplassar om vinteren, er ikkje tilstrekkeleg for å stetta krava i kommuneplanen, meiner laget.

Laget er dessutan skeptisk til korleis det vil verta gjennomført i praksis, då parkeringsplassen ved Osen ifylgje parkeringslaget brukar å vera heilt full til dømes i påsken.

Veg eller ikkje veg?

Det er heller ikkje vegtilkomst til den planlagde lagshytta, skriv styreleiar Geir Helge Johnsen på vegner av laget. I søknaden er det nemnt ein sommarveg heilt i vasskanten, men parkeringslaget kan ikkje skjøna at dette er å rekna som veg.

– Dette er ikkje nokon veg, men den tørrlagde strandsona i Hamlagrøvatnet når det er nedtappa – noko magasinet ikkje er på hausten, skriv Johnsen.

HF har sett fleire flyfoto av området som er tekne på sommarstid, og på alle er vegen teken i bruk, sjølv om parkeringa er så godt som tom. Bileta er tilgjengelege på norgeibilder.no. Om ikkje det er «vanleg» å parkera ved hyttene, ser det i alle fall ut til å vera «vanleg» å ha bil ståande langs vegen like ved. Også godt forbi der lagshytta er planlagd, står det parkerte bilar på bileta.

Hjå Statens vegvesen er vegen registrert som privat.

Grønt lys for nybygg i Hamlagrø

– Kjenner ikkje til søknad

H2 Hardanger AS er ansvarleg søkjar. I eit svar til nabomerknader som òg tok opp temaet med parkeringsplassar, påpeika verksemda at hjelpekorpset har avtale om parkering på «Søreplassen», 1,7 kilometer ifrå parkeringa ved Osen. Avtalen der vil verta vidareført, slik at det finst fleire moglegheiter for parkering og varetransport, opplyser verksemda.

Hjelpekorpset må halda seg til dei parkeringsplassane det er gjort avtale om, og tilpassa drift og løysingar ut frå dette, meiner entreprenøren.

Korkje rådmannen eller planutvalet såg på talet på parkeringsplassar som eit problem. Det er nok med to parkeringsplassar og sommarparkering på eiga tomt, meiner rådmannen.

Parkeringslaget har kommentert også eitt av vilkåra i det kommunale vedtaket. Vedtaket seier at utvida bruk av avkøyrsla til bruk av Hamlagrøvegen må vera godkjend før det vert gjeve igangsetjingsløyve. Eigedomen vert disponert av parkeringslaget, som ikkje kjenner til at det ligg føre nokon søknad om bruk av avkøyrsla og vegen.

– Me er i utgangspunktet skeptiske til ein slik endra bruk, både på grunn av auka trong for vedlikehald og fordi avkøyrsla ikkje nødvendigvis er dimensjonert for det, skriv Johnsen.