— Rassikring er eit nasjonalt ansvar
Rassikring av omkøyringsvegar, som fylkesveg 49 i Tokagjelet, må få meir pengar frå staten.
Det meiner Vestland Frp, som i helga vedtok ein resolusjon om saka. Fylkespartiet påpeikar at særleg fylkesvegar som både har ein omkøyringsfunksjon og ein regional eller nasjonal funksjon, treng ein kraftig auke i løyvingane til rassikring.
— Det er store uløyste rassikringsprosjekt i fylka som krev finansiering for at vegane skal bli tryggare å ferdast på. Ein kraftig auke av midlane må visa konkret igjen allereie i komande års statsbudsjett, heiter det i resolusjonen, som Frode Nygård frå Kvam føreslo.
Vestland Frp vedtok innspel til arbeidet med Nasjonal transportplan, som vert fremja i vår. Mellom vegprosjekta som er nemnde, er rassikring av Tokagjelet. Prosjektet må få statlege kroner i NTP, meiner fylkeslaget.
Laget krev dessutan at vedtaket om konseptvalutgreiing av den såkalla armen frå europaveg 134 til Bergen vert gjennomført, ettersom vegen vil betra samfunnsøkonomien i E134. Vidare må riksveg 13 mellom Hardangerbrua og Kinsarvik koma inn i NTP, meiner Vestland Frp, som elles krev ei statleg finansieringsordning som gjer fylkeskommunane i stand til å ta att eit stort vedlikehaldsetterslep på fylkesvegane.
