Rasmussen kan få roret
Tom Rasmussen ligg an til å verta ny dagleg leiar i Kvammabadet KF.
Han tek i så fall over etter Frank Helland, som har leia føretaket både som styreleiar og dagleg leiar det siste året. Det var inntil valnemnda oppdaga at ordninga er ulovleg. Kommunelova slår nemleg fast at dagleg leiar ikkje kan vera styrelem i kommunale føretak.
Rådet om å tilsetja Rasmussen, som styret i føretaket drøftar 12. januar, kjem frå Helland og den ferske styreleiaren Reidun Skålheim Solberg. Dei meiner, etter å ha både lese CV-en hans og snakka med Rasmussen, at han er kompetent til å fylla rolle på ein god måte. Rasmussen driv eige konsulentselskap og har røynsle frå bank, rekneskapskontor og forsikring.
Ifylgje saksutgreiinga skal konsulentselskapet fakturera Kvammabadet KF 1.500 kroner pluss moms i timen for tenestene til Rasmussen, men berre inntil det vedtekne taket for honoraret på 70.000 kroner er nådd.
Dagleg leiar i føretaket skal mellom anna fylgja opp drifts- og samarbeidsavtalen med Hardangerbadet Eigedom AS.
