Rapporterte om folkehelsa
Kvam herad nytta i fjor folkehelsetilskotet frå Vestland fylkeskommune til å halda oppe og vidareutvikla det systematiske og heilskaplege folkehelsearbeidet.
Det skriv rådmannen i ein rapport til fylkeskommunen.
Desse prosjekta og tiltaka var prioriterte i folkehelsearbeidet i Kvam i 2020:
• Folkehelseoversikta
• Juniorforskar-prosjektet: Fem niandeklassar i hardangerkommunane, Voss og Samnanger tok del.
• Kvammaveko: Fokus på psykisk helse. For det meste avlyst i 2020, men kjem attende i 2021.
• Av-og-til: Rusførebyggjande arbeid, har vore gjennomført digitalt.
• Trafikksikker kommune.
• Fritidskortet: Å bidra til at fleire born og unge får delta i fritidsaktivitetar. Utvida til 2022.
• Ung fritid: Eit aktivitetstilbod for born og unge i alderen 10—16 år. Eit samarbeid med ei rekke lag og organisasjonar i skuleferien.
• Lokalsamfunnsutvikling: Livoglyst i Øystese og utvikling av Haugamyr aktivitetsområde i Norheimsund.
• Dagsturhytte ved Krokavatnet: Hytta er på plass, open og i bruk.
— Kvam har vore og ynskjer å fortsetja med å vera ein aktiv deltakar i folkehelsesamarbeidet i Vestland fylke, skriv rådmannen.
Arbeidet er forankra i folkehelselova, i samfunnsdelen til kommuneplanen og i fleire kommunedelplanar. Heradet har ei overordna folkehelsegruppe. Ho har ansvaret for å halda oversikt over arbeidet. Kvam herad har òg etablert eit plan- og samarbeidsforum. Her deltek folkehelsekoordinator, kommuneoverlege, ein born- og ungerepresentant, teknisk eining og planleggjarar.
Folkehelsearbeidet har, i likskap med mykje anna, vore prega av koronapandemien.
