Rådmenn vil ha klarare oppdrag

Det lurar dei på sjølve, vel eitt år etter at det såkalla rådmannsforumet i regionen fekk oppdraget med «vidare oppfølging mot planavdelingane i medlemskommunane».

Det rådmennene i fellesskap skulle fylgja opp, var eit vedtak om å laga ein ikkje juridisk bindande forvaltingsplan for fjorden, etter reglane om interkommunalt plansamarbeid i plan- og bygningslova.

Når saka sidan har vore etterlyst politisk, har ordførarar i regionen vist til at ansvaret no er plassert i dei kommunale administrasjonane.

Rådmannen sjølve har ei litt anna oppfatning. I eit «minimøte» i rådmannsforumet 9. februar drøfta rådmennene Anita Hesthamar i Kvam, Thore Hopperstad i Ulvik og Magnus Steigedal i Eidfjord saka. Møtereferatet røper at dei ikkje har føreteke seg noko i saka sidan regionrådet plasserte ansvaret i januar 2023. Dei meiner at rådet bør drøfta saka igjen og helst koma med eit klarare mandat og vedtak. Rådet bør dessutan koordinera oppfylging og møte på tvers av kommunane, meiner rådmennene.

Saka vert difor teken opp att i regionrådet i møtet i Norheimsund torsdag 21. mars. Administrasjonen legg saka fram utan noko framlegg til vedtak.

Rådet har i tidlegare møte om saka vorte orientert av både fylkeskommunen og Nordhordlandsrådet om mellom anna val av plantype og framdrift. Det var fylkeskommunen som rådde regionrådet til å laga ein ikkje juridisk bindande plan.