Kvam ungdomsråd tok denne veka grep for å verta betre kjent med elevråda i Kvam. Varamedlem Sondre Fagerheim Lunestad (t.v.), nestleiar Vegard Eide Aase og medlem Hallvard Valland Norheim fortalde mellom anna kva ungdomsrådet gjer.

Råd inviterte råd til bli kjent-møte

Kvam ungdomsråd skal tala ungdommen si sak i Kvam, men innspel frå dei mange elevråda i heradet har vore ei mangelvare.

Bård Valvatne
Journalist
Publisert

For å bøta på dette, inviterte ungdomsrådet elevråda til demokratiopplæring i heradsstyresalen.

– Målet med demokratiopplæringa er å få vita meir om elevråda, og å verta betre kjende med medlemene. Samstundes vil me læra dei litt om korleis lokaldemokratiet fungerer, fortel nestleiar i Kvam ungdomsråd, Vegard Eide Aase.

Sondre Fagerheim Lunestad er varamedlem i ungdomsrådet.

– Det er viktig at elevrådsrepresentantane skjønar kva ansvar dei har, samstundes som dei skjønar korleis ungdomsrådet kan hjelpa. Det verkar ikkje som om alle er klar over dette. Det er sjeldan elevråda tek kontakt med oss. Me håpar demokratiopplæringa skal endra på det, seier han.

Gruppearbeid var ein del av demokratiopplæringa. Her utvekslar Guro Bell Berge (t.v.), Halvor Økland og Otilie Bjelland Sætrenes erfaringar.

Lovar å ta tak

Frå talarstolen fortalde Aase og Lunestad mellom anna at Kvam ungdomsråd er eit talerøyr for dei unge i heradet. Rådet har tale- og møterett både i formannskapet og heradsstyret.

– Kvam ungdomsråd skal hjelpa dei folkevalde og administrasjonen med å forstå kva som er viktig for oss som er unge. Om de ikkje er nøgde med noko til dømes på skulen, står de fritt til å ta kontakt med oss. Me skal gjera alt me kan for å hjelpa dykk, sa Aase.

Aase og Lunestad seier til HF at dei ikkje kjenner til at det har vore demokratiopplæring i Kvam tidlegare.

Deltakarane fekk øva litt på å diskutera. Mellom anna drøfta dei kva som er best av hamburgar og kebab.

– Det kunne vore kjekt å ha dette jamleg. Om ikkje årleg, så i alle fall annakvart år, seier Aase.

Demokratiopplæringa er eit samarbeid mellom Kvam ungdomsråd og Kvam herad. Administrativ rådgjevar og ungdomsrådskoordinator Kari Weltzien Vik og Ingunn Hildonen Teigland, som koordinerer den tverrfaglege innsatsen for born og unge, representerte heradet i demokratiopplæringa.

Tysdag var elevrådsrepresentantar for ungdomsskulane og elevrådet til Kvam kulturskule på opplæring. Fredag står representantar for mellomtrinna for tur.

Ungdomen hadde teke over heradsstyresalen tysdag.

– Veit meir no

Abdulaziz Mohamed Saalah, nestleiar i elevrådet til Kvam ungdomsskule, og Lena Øygard, elevrådsleiar frå Strandebarm skule, var to av deltakarane tysdag.

– Eg føler me har lært litt om demokratiet, og om kor viktig det er å stå opp for det du trur på, seier Øygard.

Dei stadfestar at elevråda deira har hatt lite kontakt med ungdomsrådet.

Abdulaziz Mohamed Saalah (t.v.) er nestleiar i elevrådet ved Kvam ungdomsskule, medan Lena Øygard er elevrådsleiar ved Strandebarm skule. Begge tykte dei hadde hatt utbyte av demokratiopplæringa.

– Eg har høyrt litt om ungdomsrådet tidlegare, men ikkje så mykje. No veit eg litt meir, seier Øygard.

– Eg har òg lært litt om ungdomsrådet i dag, seier Saalah.

– Kjem de til å bruka ungdomsrådet meir?

– Eg trur det. Nestleiaren i ungdomsrådet kjem frå Strandebarm skule. Eg har tenkt å høyra om han vil vera med på elevrådsmøta, seier Øygard.

kvam herad politikk offentleg administrasjon nyhende norheimsund kvam ungdomsråd utdanning
Laga med Labrador CMS