Pyntar elv for auren

Det opplyser Arild Alvsåker i laget.

– Me skulle gjerne ha gjort noko meir handfast, me me rekk kort og godt ikkje å knipa det inn mellom jobb og andre ting, seier Alvsåker.

Laget har ikkje søkt om pengar til nye tiltak.

– Det går på tid og menneskelege ressursar, seier Alvsåker.

Det er fylt på med jord langs elva, og kantvegetasjon er planta. Vatnet har fått bra med plass, og ein har lagt ut steinar så elva ikkje vert så monoton, fortel Alvsåker.

Laget leigde i fjor inn ei gravemaskin med sjåfør. Mesteparten av arbeidet vart utført av grunneigarlaget og sportsfiskarar. Det er dei same folka som har samla inn stamfisk til genbanken, fortel Alvsåker.

Det var tørt vêr ganske langt utover hausten i fjor. Då det kom regn, var Alvsåker og kika i elva. På den beste dagen talde han 15 sjøaurar frå Movatnet og opp til bakeriet. Det var fisk i storleik frå like under éin kilo til tre kilo, fortel han.

Om det er meir eller mindre fisk i elvar enn før, er litt tidleg å seia, seier han. Fisken må få gyta, og så må ein sjå om nokre år kor mange som kjem att.

– Men gytefisk stod det på heile strekkja ein månad etter at me avslutta arbeidet, seier Alvsåker.

Kjem det regn i september, er det litt tidleg. Men når det kjem regn i oktober, og bekkene aukar, kjem den fyrste auren, fortel Alvsåker.

Prosjektet er tidlegare støtta av Miljødirektoratet, Sparebankstiftinga Hardanger, Statsforvaltaren i Vestland, Kvam fiskefond, grunneigarlaget og Hardangerfjord Villfisklag. Det som måtte koma av utgifter på slutten av prosjektet, vil grunneigarlaget dekkja, seier Alvsåker.

– No er det snart haust igjen, og då kjem den vanlege jobben med å henta inn fisk til genbanken på hausten som me alltid gjer. Då tenkjer eg at me har nok arbeid i år, seier Alvsåker.

Genbanken i Simadal tek ut levande fisk frå kring 20 vassdrag i Hardangerfjorden på hausten, har Alvsåker opplyst til HF tidlegare.

Villfisken vert send til genbanken. Der vert han gåande i kar fram til han er klar for gyting. Då vert fisken «stroken» for rogn og mjølke. Den befrukta rogna vert lagd i rognkassar. Der ligg ho til ny yngel vert klekt på våren. Men genbanken har bruk for berre ein del av rogna. Resten vert ført tilbake til vassdraga og planta ut i elvegrusen i mars, fortel Alvsåker.