Pussar opp for leigeinntekter
Kvam Bustadstifting gjekk frå eit negativt årsresultat på 0,6 millionar kroner i 2020 til eit positivt resultat på 0,8 millionar kroner i 2021.
Det går fram av årsrapporten frå stiftinga.
Verksemda reiser og kjøper bustader for utleige til særleg vanskelegstilte grupper. Eldre, funksjonshemma, studentar, skuleelevar, ungdom i etableringsfasen og flyktningar og innvandrarar med opphald på humanitært grunnlag kan leiga bustadene.
Bustadstiftinga sit i dag på 23 utleigebustader. Marknadsverdien på eigedomsmassen er, inkludert det såkalla Lærlinghuset, nær 60 millionar kroner, opplyser styreleiar Ottar Randa.
Beheld utbytet
Ingen tek ut utbyte frå stiftinga. Det gjer at bustadstiftinga kan nytta pengane til vedlikehald av bustadene og kjøpa nye bustader.
Organisasjonen består av ein innleigd dagleg leiar i 20 prosent stilling og eit styre som er oppnemnt av Kvam heradsstyre. Styret samtalar årleg med Nav og administrasjonen i Kvam herad. Styremedlemene er for tida Geir Madsen, Karin Mo Valland og Elfrid Oma. Nestleiar er Bjørgulv Hauger og leiar Randa.
Stiftinga bygde sin så langt siste bustad på Seland i Norheimsund i 2018. Fleire husvære vart totalrenoverte i 2020 og 2021. Hausten 2019 overtok stiftinga bygget der tidlegare Seim Trafikkskule heldt til og kalla det Lærlinghuset. Huset er ein bufellesskap for ungdom under utdanning, med plass til ni. Det vart ferdig oppussa for seks millionar kroner i august 2021.
Prioriterer vedlikehald
Hovudtyngda av eigedomane ligg i Øystese og Norheimsund. Stiftinga har gjennom mange år prioritert å halda dei vedlike. Det er òg utarbeidd ein eigedomsstrategi for korleis ein ynsker at bustadmassen skal haldast og utviklast.
Stiftinga hadde 3 millionar kroner i driftsinntekter i 2021, mot 2,4 millionar i 2020. Driftsresultatet i 2021 var 1 millionar kroner, mot minus 0,2 millionar kroner året før.
– Me driv sunt og godt. Rekneskapen vår er heilt grei, og me har ei grei og trygg drift. Ut frå omsetninga og innteninga har me gjort det veldig bra dei siste åra, seier styreleiar Randa til HF.
– Lever av leige
– Til neste år vil me får eit endå betre resultat. Me har investert tilbake veldig mykje i bustadmassen og bygt oss opp over lang tid. Det er leigeinntektene me lever av. Me har ingen tilsette og ingen lønskostnader, berre eit svært beskjedent styrehonorar. Stiftinga er sjølveigd og sjølvstyrt, seier Randa.
Stiftinga hadde per 31.12.2021 ei langsiktig gjeld på kring 32 millionar kroner. Eigenkapitalen gjekk frå 5,3 millionar kroner per 31.12.2020 til 6 millionar kroner året etter. Stiftinga hadde 31.12.2021 38,6 millionar kroner i eigedelar.
