Pussar opp bedehus i Jondal

Haldis Bakke leiar, saman med Liv Helga Gulestøl, Jondal Indremisjon. Dei har sett i gang oppussing av det som vert kalla «storesalen» i Jondal bedehus.

Rommet er, saman med eit anna rom, det eldste i bedehuset. Huset vart bygt for 90 år sidan, og pussa opp både på 1960-talet og for 20–25 år sidan, seier Bakke.

Bakke fortel at salen hadde dårleg og lite lys. Planen var fyrst å utbetra lysanlegget. Då fagfolk var på synfaring, viste det seg at salen trong nytt tak for at det kunne lata seg gjera. Difor har arbeidarar frå Bygger'n Jondal senka taket med 20 centimeter og isolert det.

– Det er høgt under taket likevel. Me er spente på korleis det vert når det er ferdig, seier Bakke.

Ifylgje Bakke er kostnaden med taket og lyset 400.000 kroner. I tillegg skal salen målast. Då HF snakka med Bakke tysdag ettermiddag, sat ho i styremøte i indremisjonslaget. Styret skulle bestemma kven som skulle få jobben med å måla.

Bakke fortel at bedehuset er mykje brukt utanom møte. Ho seier at huset ofte vert leigt ut til minnesamvær, barnedåp, konfirmasjon eller bursdag.

– At me tilbyr utleige, er viktig for Jondal. Det er ikkje så mange plassar å leiga i bygda, men her er det eit eigna lokale med god plass, eit ekstra rom og romsleg inngangsparti. Det er triveleg å vera der, og me gler oss til å bruka det når alt er klart, seier Bakke.

Bakke trur elektrikarane vert ferdige denne veka. Så fort dei er ferdige, skal stillaset vekk. Om alt arbeidet vert ferdig før eller etter jul, av heng av når målarane har tid.