Publikumssjokk for kraftverksjubilantar
Denne våren er det 50 år sidan kraftverket i Austrepollen vart sett i gang. Over 300 møtte opp for å feira saman med jubilanten Statkraft.
Dei hadde kanskje sett for seg eit hundretals gjester då dei planlagde jubileumsfesten i Austrepollen, men vart kraftig overraska.
– Me har talt oss opp til 300, smilte kraftverkssjef Vidar Riber etter at mann- og kvinnetalet for 50-årsdagen var gjort opp.
Det kvite gullet
Statkraft laga torsdag 13. juni til ei jubileumsfeiring for å markera at igangsetjinga av kraftstasjonen i Austrepollen, eller maurangerverka, som ein også kallar det.
– Det er ein femtiåring som er som femtiåringar flest – litt sliten og treng litt oppgradering og rehabilitering, sa regiondirektør Svein Ilstad då han gratulerte tilsette, grunneigarar og resten av dei frammøtte med dagen.
Ein viktig del av 50-årsjubileet var boka «Det kvite gullet», ført i pennen av Sigurd Vikøren. Han fortalde dei frammøtte om boka og arbeidet med henne.
– Det er mykje viktig stoff ein burde presentera, innleia han.
Han sa at 12 liv er ein høg pris å betala for vår velferd, med referanse til blant anna ulukka i Rennedalen, som tok sju liv.
– I små bygdesamfunn har ein betalt mykje og bidrege med mykje verdiskaping. Kvinnherad, som me kjenner det i dag, hadde ikkje vore slik utan denne innsatsen, og det er lett å gløyma at gamle Jondal har ein stor del av kreditten for det som har blitt her. Gratulerer med jubileet! la Vikøren til.
– Gledeleg besøk
Alle som deltok på jubileumsdagen, kunne få med seg eit eksemplar av boka, eit tilbod om lag alle nytta seg av.
– Boka er viktig for å knyta arbeidet og historia saman med det ein har gjort her, og ho har også ein eigen verdi med tanke på dei nye planane her i Mauranger, seier kraftverkssjef Riber om «Det kvite gullet».
Han noterte med glede at dei måtte dra fram stadig fleire stolar for å få sitjeplassar til flest mogeleg. Dei vel 100 stolane inne i teltet var på ingen måte nok. Og trass i at heile 8. trinn ved Rosendal ungdomsskule var på plass, var snittalderen på festlyden såpass høg at stolar måtte til.
– Me er veldig overraska over alt besøket, og me er veldig nøgde. Det har strøymt på, mykje takk vere vêret, sa Riber.
I tillegg til talar og helsingar baud Statkraft på varierte aktivitetar, spelemann Aleksander Røynstrand og folkedansar Ulf-Arne Johannessen, som varta opp med eit hallingkast såpass vaksne folk ikkje skal kunna klara. I tillegg vanka det mat og drikke til dei frammøtte, inkludert ein endelaus straum av kaker.
– I går hadde me jubileumsmiddag med veteranar og andre, total oppunder 60. Det var også ei kjekk stund. Men det me har fått her i dag, overgår alt me hadde sett føre oss, slutta Riber då dei programfesta postane var unnagjorde.
