Prøveuttak møter motstand
Prøveuttaket av stein på Eide i Tørvikbygd vil vera eit stort terrenginngrep som ikkje gjer det rett å setja til sides omsyna bak kommuneplanen.
Det skriv Direktoratet for mineralforvaltning (DMF) i ei fråsegn til søknaden om dispensasjon.
Det er søkt om byggjeløyve og dispensasjon frå landbruks-, natur- og friluftsføremålet i kommuneplanen, delar av omsynssone for ras og skred, og krav om reguleringsplan. Prøveuttaket er på 9.000 kubikkmeter stein frå to område. Eit uttak på 1.000 kubikkmeter i område 1 vil sikra tilkome til område 2, der resten skal takast ut.
Spørjande til omfang
Rådmannen i Kvam har stilt seg positiv til prøveuttaket. DMF, derimot, tilrår ikkje å dispensera frå plankravet i kommuneplanen. Dessutan er prøveuttak etter minerallova vanlegvis avgrensa til 2.000 kubikkmeter, med mindre det ligg føre særlege grunnar, påpeikar DMF.
DMF set spørjeteikn ved omfanget og om føremonane veg tyngre enn ulempene. Ifylgje søknaden tilrår konsulentar prøveuttak for å få betre kunnskap om steinførekomsten. DMF meiner at dei geologiske undersøkingane allereie har vist at bergmassane er stabile, og at det ikkje er trong for eit så stort uttak.
Direktoratet meiner tiltaket må reknast som eit vesentleg terrenginngrep, og at ein dispensasjon frå plankravet vil setja omsynet bak føresegna vesentleg til sides.
– Svært uheldig
Også Statsforvaltaren i Vestland er kritisk til søknaden. Han held i innspelet fast ved tidlegare innspel om at det konfliktfylte steinuttaket bør vurderast i kommuneplanen. Tiltaket vil byggja ned naturområdet og gje uheldige verknader for dei som bur langs Eidesvegen, meiner ho.
– All den tid me er negative til reguleringsplanen, meiner me det vil vera svært uheldig å starta tiltak i området før ein godkjend plan eventuelt vert vedteken. Prøveuttak i det omfanget det er søkt om, vil bidra til å byggja ned eit viktig naturområde, skriv Statsforvaltaren.
Ho gjer merksam på at ho ikkje er kjend med tidlegare uttak av kring 50.000 kubikkmeter massar i området, men har sett på flyfoto at det er «gjort relativt store terrenginngrep forskjellige stader på eigedomen». Ho ber difor om at heradet gjer greie for den juridiske statusen for tiltaka.
– Still krav!
Fylkeskommunen meiner at prøveuttaket bør avgrensast i tid, og at lastebiltransporten ikkje bør skje når born og unge skal reisa til og frå skulen. Dessutan må køyremønsteret vera rett på fylkesveg 576, av omsyn til busstoppet like ved. Om det vert gjeve dispensasjon, må det stillast krav om at vegetasjon vert fjerna nær avkøyrsla og langs Eidesvegen for å sikra god sikt.
– Det vert skildra at prøveuttaket ikkje vil føra til auka trafikkmengd i vegkrysset samanlikna med trafikken som er i dag, og avkøyrsla vert vurdert som romsleg og oversiktleg. At ei avkøyrsle er romsleg, er ikkje berre positivt. Trafikkmønsteret vert utflytande og uoversiktleg, og farten ofte høgare enn situasjonen tilseier, skriv avdelinga for infrastruktur og veg i fylkeskommunen, som ikkje kjem til å godta utvida bruk av dagens avkøyrsle.
