Prøver igjen på kultursenter: – Eit smykke Jondal fortener
Berre Raudt streta imot då planen for utviding av Hardanger House og eit nytt kultursenter omsider kunne sendast på høyring.
Acos Invest AS – med Conrad Hansen som ei sentral drivkraft – har ikkje gjeve opp vona om eit breinspirert «kulturhus» med inntil ti nye hotellrom på sjøsida av Akkjerhaugen i Jondal. Selskapet har såleis sendt Ullensvang kommune eit nytt utkast til reguleringsplan for området i Vik, fem år etter at planarbeidet vart varsla fyrste gong.
Vegen til godkjend plan har med andre ord ikkje vore utan humpar i vegen, mellom anna som fylgje av protestar frå Statsforvaltaren mot privatisering av strandsona. Så langt gjekk det at tiltakshavaren la planane på is på grunn av haldninga til kommunen.
No meiner kommunen at planen er godt nok tilpassa med tanke på å gje ålmenta tilgang til området.
Einsleg skeptikar
Det er eit stort fleirtal i utval for samfunn, plan og næring samd i. Med unntak av R røysta utvalet 24. januar for å senda planutkastet på høyring. Motstanden i partiet botnar i prinsipiell motstand mot utbygging i strandsona og i friområde, forklara Lisa Karine Haugland (R). Ho meiner tiltaket verkar inngripande.
– Det er flotte planteikningar og gode intensjonar, men eit friområde skal vera for allmenn ferdsle. Det er ikkje opp til private utbyggjarar å leggja til rette for turområde, sa ho.
I andre parti rådde positiviteten. Gjennomgangstonen var at området både vert vakrare og meir tilgjengeleg for folk flest etter utbygginga. Elin Eide Brattabø (H) meiner at effekten vil vera den stikk motsette av privatisering.
– Det er nesten ikkje råd å føta seg der i dag. Skular og barnehagar har inga mogelegheit til å ferdast der. Det kan bli eit flott turområde. Ein må av og til ofra noko for å få til noko, sa jondølingen.
– Må nytta sjansen
– Det er kjekt å sjå at saka er komen att. Dette har vore eit langt lerret å bleikja, sa ordførar Roald Aga Haug (Ap).
Han meiner utbyggjaren har prova ekte interesse for å byggja med høg kvalitet og sikra interessene til ålmenta. Kommunen må sikra at også etterkomarane må gjera det same, påpeika han. Han minte om at det i dag står ein gamal, unytta verkstad som skjemmer strandsona i området.
– Det som er laga til, er flott. Dette kan verta eit smykke Jondal fortener, sa Haug.
Hardanger House har i dag ni hotellrom, og kan altså få inntil 19 om planen vert realisert. Haug meiner få vil vera i stand til å få eit hotell med berre ni rom til å gå med overskot.
– Me skal vera uroa i strandsona, men når ein velmeinande investor vil leggja ned store ressursar og i naturmessig skikkeleg arbeid, må me ikkje gå glipp av mogelegheita. Ho kjem ikkje nødvendigvis att, sa Haug.
– Betre tilgang
Hardanger House Drift AS hadde i 2022 ei omsetning på 4,8 millionar kroner, og eit negativt resultat på vel 0,7 millionar kroner. Kommunalsjef for kultur, næring og samfunn, Kristian Bondhus-Jensen, sa at kommunen ikkje kjenner til besøkstala til hotellet.
Hotellet vart reist på grunnlag av ein dispensasjon Jondal kommune gav, utan at Statsforvaltaren sette seg på bakbeina. Også dette området vert regulert som del av den nye planen.
Andre Botnen (Sp) spurde om rådmannen kjenner seg trygg på at usemja med Statsforvaltaren er rydda av vegen, eller om ein risikerer ei ny motsegn i høyringa.
– Statsforvaltaren var uroa over privatisering. Difor har me justert kartet og stilt rekkjefylgjekrav. Slik eg forstod det, var det ei form for semje. Me meiner me har imøtekome Statsforvaltaren, sa planleggjar og sakshandsamar Håvard R. Apold.
– Slik me vurderer det, vert den offentlege tilgangen betre. Det vert inngrep og ein byggjer ned eit område som ikkje er nedbygt. Den vurderinga må de gjera, sa Bondhus-Jensen til dei folkevalde.
Slik er planen
Mellom grepa i planen er ein offentleg kai på kote 3, ei flytebryggje berre for av- og påstiging, fleire turstiar og offentleg tilgang til hotelltaket. Det vert lagt opp til i alt 21 parkeringsplassar og 20 sykkelplassar, sistnemnde tilgjengelege også for ålmenta. Føringane i planen tilseier at bygget skal fylgja dagens terreng best mogeleg. Byggjetiltaka skal vera i tråd med ein illustrasjonsplan. Turvegar må vera på plass før bygga kan takast i bruk.
Om planen vert godteken, vert også det tidlegare mykje diskuterte badehuset som er del av dagens hotell, formelt godkjent. Jondal kommune gav dispensasjon for bygget og inngjekk ein driftsavtale med deling av kostnadene, men opplegget gjekk ikkje gjennom nålauga til Statsforvaltaren. Det er såleis ikkje godkjent eller mogeleg å nytta. Ifylgje føresegnene i den nye planen skal huset vera offentleg tilgjengeleg og drivast av kommunen.
Eit vilkår i vedtaket i utvalet er ei geoteknisk vurdering av stabiliteten i området. Ho kom nyleg, og konklusjonen er ifylgje Apold at det er ikkje er fare for skred eller utrasing.
Då planoppstart vart varsla for andre gong våren 2022, kom det to private merknader og seks merknader frå offentlege styresmakter. Planen vart drøfta med Statsforvaltaren i fjor vår. Skepsisen hennar har fyrst og fremst vore knytt til inngrep i og privatisering av strandsona.
Ifylgje rådmannen vil eit opplevingssenter forma som ein brearm vera eit gode for Jondal. Turismen veks og fleire overnattingsplassar trengst, meiner han. Også estetisk vert utbygging eit lyft for området, synest han.
