Prova at fisk kan smaka godt
Sprøsteikt laks og sylta raudlauk var mellom rettane på menyen då elevar frå 9. trinn på Kvam ungdomsskule fekk råd frå ein profesjonell kokk.
Kokkebesøket 6. desember var ein del av undervisningsprogrammet Sjømatspire, som har som mål å få unge til å eta meir sjømat.
HF snakka med to av elevane. Mykje tyder på at opplegget kan ha ein effekt. Torstein Børsting Skeie fortel at han likar fisk og at familien et fisk til middag minst eit par gonger i veka. Han fortel òg at han likar å laga mat.
– Eg lagar ein del mat heime. Eg lagar både chili con carne, hamburgar og pannekaker, fortel han.
– Men ingen fiskerettar?
– Eg lagar ikkje så mykje fisk, men eg har laga fiskesuppe ein gong. Det kan henda eg kjem til å prøva meg på blåskjel eller noko etter å ha vore med på dette.
– Eg gler meg til å smaka
Otilie Bjelland Sætrenes er ikkje like glad i sjømat.
– Eg har vore med og fiska, og me har av og til sjømat til middag. Det er ikkje sjømat eg plar velja, fortel ho.
Ho er ikkje blant dei ivrigaste på kjøkkenet.
– Det hender eg lagar taco eller pizza, men eg er ikkje den som lagar middag til familien. Det har eg ikkje tid til, seier ho.
– Kjem opplegget du var med på i dag, til å endra på dette?
– Den panerte laksen ser veldig god ut, så den freistar det litt å prøva. Det kan hende eg lagar det til middag ein dag, seier ho.
Begge elevane gledde seg til å smaka rettane dei hadde vore med på å laga.
– Ja, eg trur det vert veldig godt, fortel Torstein.
– Eg gler meg til å smaka, seier Otilie.
Teori og praksis
Christer Økland underviste elevane. Han er direktør for mat og drikke i Fjordtind Hotels AS, verksemda som driv Hardangerfjord Hotel.
Økland fortel at han byrja med å læra elevane litt teori om sjømat, før han mellom anna synte dei korleis ein fileterer ein torsk. Elevane fekk smaka sushi laga av fersk torsk, og dei fekk smaka rå kamskjel.
– Dei fleste våga å smaka på torsken, og ein god del våga seg borti kamskjela òg, fortel han.
Etterpå fekk elevane prøva seg som kokkar. Dei laga laks som var marinert med soyasaus og panert med cornflakes, før fisken vart sprøsteikt. Elevane laga òg strimla gulrot og agurk, sylta raudlauk og heimelaga majones.
Økland snakka dessutan litt om blåskjel og synte korleis det kan lagast.
– Dei åt opp
– Alle har ikkje like godt forhold til sjømat. Men når elevane får fisk laga på ein ny og litt annleis måte, så tykkjer dei det er godt. Alle åt opp alt. Det tenkjer eg er eit godt teikn, seier Økland.
– Kor flinke er dagens 9.-klassingar til å laga mat?
– Mitt inntrykk er at det varierer. Nokre er med på matlaginga heime, medan andre knapt veit kva ei steikjepanne er. Kanskje har dette endra seg dei siste åra. Tidlegare trur eg fleire unge var med på å laga mat, seier Økland.
Sjømatspire vert arrangert av Matarena AS.
