Protesterer mot kutt i kollektivtilbodet

I formannskapsmøtet 31. oktober drøfta dei folkevalde, etter framlegg frå Roald Aga Haug (Ap), ein protest mot ymse kuttframlegg frå fylkesdirektøren i Vestland. Framlegget vart, med nokre mindre justeringar etter innspel frå Sp, samrøystes vedteke.

Etter ei innleiing med mykje ros til eigen kommune hevdar formannskapet i fråsegna at ullensvangarane har «dei største avstandane, den dårlegaste infrastrukturen, den største rasfaren og det svakaste kollektivtilbodet i fylket».

– Me ligg på topp i verdiskaping i mange bransjar, trass infrastrukturen og dårleg kollektivtilbod. Difor kan me ikkje akseptera at tilboda vert ytterlegare svekte. Dei burde ha vore styrkte, heiter det i fråsegna.

Fylkesdirektøren har teke til orde for kutt i kveldstilbodet i bussrutene 925 og 930 på strekninga Bergen–Norheimsund–Odda for å spara til saman 1,8 millionar kroner. Rute 930, som går heilt frå Bergen til Odda, er den største suta til ullensvangarane. Ruta vert nytta, er den einaste som går direkte til Bergen og bind saman bygdene i Hardanger, påpeikar formannskapet i fråsegna.

Turistbåtruta kan mista det fylkeskommunale tilskotet og såleis truleg verta lagd ned. Kommunen hevdar at Hardanger er i ferd med å verta det sterkaste norske utstillingsvindauga. Båtruta avlastar vegnettet, som frå før er «sprengt i sommarsesongen».

I tillegg klagar kommunen si naud over risikoen for å mista ferja mellom Kinsarvik og Utne, eit tiltak som skal spara fylkeskommunen for 19 millionar kroner.