Private omsyn i Jondal stoppar i statleg nålauga
Jondal kommune legg vekt på trong for større plass i dispensasjonssaker. Den slags får ikkje passera hjå Fylkesmannen
I sommar har to saker kome i retur med negativ fråsegn frå Statens hus i Bergen. I båe sakene påpeikar Fylkesmannen at den kommunale sakshandsamaren har lagt på føremoner som er av privat karakter. Dei veg lite mot ulemper av samfunnsmessig karakter, slår han fast.
Når statlege eller regionale styresmakter har protestert i høyringa, bør ikkje kommunane gje dispensasjon. Det er såleis viktig for både søkjarar og kommunar å argumentera godt for det omsøkte tiltaket når saka vert send på høyring.
I den eine saka, ein søknad frå Ingrid Helena Jondahl om tilbygg og fasadeendring på gard nummer 28/9 i Elvabrotet i Jondal sentrum, skriv rådmannen at eit «tungtvegande argument i denne saka er at familien har behov for meir plass», og at alternativet er å flytta frå huset. Rådmannen meiner elles at ikkje det ikkje finst negative følgjer av å gje dispensasjon, og han sende difor ei saksutgreiing med positiv tilråding å høyring.
Fylkesmannen lèt seg ikkje overtyda så lett. Han skriv at han har forståing for arealtrongen, men at «reint personlege fordelar kan normalt sett ikkje ha avgjerande vekt i dispensasjonsvurderingar». Ein dispensasjon kan skapa presedens, og «heile området kan etter kvart miste sin verdi», heiter det i fråsegna. Fylkesmannen minner om at området er unikt og har kulturhistorisk og landskapsmessig verdi. Reguleringsføresegna for «bustadområde bevaring» set foten ned for nybygg i området, noko rådmannen i Jondal ikkje har nemnt i saksutgreiinga.
Den andre saka gjeld eit tilbygg til ei hytte på gard nummer 36/155, med Hallvard Torsnes som søkjar. Fylkesmannen påpeikar at rådmannen ikkje har vurdert saka etter det generelle byggjeforbodet i strandsona, berre etter forbodet i landbruks-, natur- og friluftsområde. Han meiner tiltaket vil privatisera strandsona, og påpåpeikar at tilbygget i to høgder vil vera i strid med føringar i kommuneplanen om hytter i éi høgd. Ulempene er også i denne saka av samfunnsmessig karakter, skriv Fylkesmannen, som frårår tiltaket. Tilbygget vil utvida bruksarealet frå 57 til om lag 100 rutemeter.
Sakene vil verta lagde fram for plan- og driftsutvalet i Jondal.
