Prideflagg fekk juling

På ein garasjevegg ved bustaden han og sambuaren disponerer sentralt i Vikøy, hang eit stort prideflagg uskadd laurdag kveld. Sundag morgon, då Valland skulle gå tur med hunden, oppdaga han at noko hadde skjedd om natta: Den nedste delen av flagget vart klipt eller skore i. Flagget var ille medfare og hang dels i filler.

– Eg vart både forbanna og sorgfull. Det er berre trist. Det er éin ting å vera usamd i meiningane mine, noko anna å ta seg inn på ein eigedom og gjera noko slikt som dette. Dei ville visst verkeleg gje uttrykk for noko, seier Valland.

Han presiserer at han ikkje kan vita kven som stod bak eller kva motivet er, men trur at det må liggja noko bak når ein går så langt som i dette tilfellet. Born vil normalt ikkje nå høgt nok til å kunna skada flagget utan å stå på skuldrene til einannan. Og hadde dei lånt stigen, trur Valland at han hadde høyrt dei om natta.

Han meiner han har hatt flagget i to år. Då det vart kjøpt, hadde han eit overvakingskamera ved flaggstonga fordi han var litt usikker på om det ville få henga i fred. Overvakinga droppa han etter flyttinga, mellom anna av di han rekna med at flagget hang så ulagleg til at ingen ville finna på å skada det. Så feil kan ein ta.

– Kvifor har du flagget?

– Eg har folk i omgangskrinsen som har hatt det tøft. Dette er ei billeg erklæring frå mi side om at eg støttar kampen deira. Det er betre at dette skjer med oss heterofile enn at dei ytrar seg mot homofile, seier Valland.

Han forsikrar om at det kjem til å dukka opp minst eitt nytt flagg.

– Kanskje eg skal kjøpa fleire små, så det spreier seg som eit virus. Prideflagg skal det i alle fall vera på denne eigedomen! seier Valland.

Han har meldt hærverket til politiet.