– Presenterer mykje lokal informasjon
Lionsklubbane i Strandebarm og Norheimsund har i år kalla Lionskatalogen for Kven, kva, kor i Kvam.
Telefonregisteret byggjer på ein godt oppdatert database, opplyser Johannes Byrkjeland i Lions i ei pressemelding. Ein byter ut 700 namn denne gongen.
Forutan registeret har katalogen mykje informasjon frå heradet og eit bransjeregister over alle firma i Kvam som ikkje finst andre stader. Ei oppdatert oversikt over frivillige lag og organisasjonar i heradet er med. Katalogen har òg fått med gebyr for og prisar på kommunale tenester.
Katalogen har kome ut annakvart år sidan før 2000. Han har alltid vore populær for den eldre generasjonen, sidan han har stor skrift og er lettlesen.
– Mange registrerer seg ikkje på 1881.no, men vil gjerne stå lokalt, opplyser Byrkjeland.
Lions trur framleis at skriftleg informasjon kan vera kjekt å få i hendene, skriv han.
