Potten er tom att
Måndag 22. mai opna Kvam herad opp for nye søknader om tilskot til klimatiltak. To veker seinare er kranen stengd.
– Det er no kome 376 søknader, og me har stengt ordninga inntil me ser kor mykje som er brukt. Me beklagar dette, skriv heradet på heimesida.
Ordninga var med andre ord minst like populær no som før jul. Då fekk næringssjef i Kvam herad, Jan Tjosås, fleire hundre søknader på få veker. At det gjekk fort sist, hadde folk fått med seg.
– Var dette som venta?
– Ja. Folk sat oppe om natta. Det var kome 62 søknader før eg kom på arbeid morgonen etter, skriv Tjosås til HF.
I søknadene går det mykje i det same, opplyser han. Installasjon av varmepumper, nye omnar og etterisolering er populære tiltak. Næringssjefen har som mål at alle skal ha fått svar innan 20. juni. Fyrst då veit han kor mykje det er søkt om totalt.
Totalt seks millionar er sette av til tiltaka. Tiltaka ein søkjer om stønad til, må setjast i gang innan eitt år og vera sluttførte innan to år. Inntil 30 prosent av kostnaden kan støttast, med eit tak på 50.000 kroner, står det i vilkåra.
Klima- og energifondet skal normalt berre brukast til tiltak som gjev miljøeffekt i Kvam.
