Postkassetrimmen ebbar ut

Det skriv gründer Mats Byrkjeland i ein e-post til brukarane. Han har drive den populære turappen på fritida sidan 2017. Å halda appen ved like krev mykje arbeid, og no var det nok.

Å utvikla og driva Postkassetrimmen har vore både kjekt og lærerikt, men no er det kome til eit punkt der arbeidet mest gjev dårleg samvit for det han ikkje har tid til, skriv han. Avviklinga skjer til neste år.

Motivasjon og helsevinst

Kor mange kvemmingar som er aktive brukarar, har ikkje Byrkjeland tal på, men han seier det er 1.039 ulike personar som har vitja minst eitt turmål i Kvam det siste halve året. Det er inkludert eventuelle besøkjande i heradet, men det gjev ein liten peikepinn. På landsbasis har 4.966 unike brukarar hatt 10 eller fleire innsjekkingar det siste halvåret.

– Eg veit at mange har lagt svært mykje innsats i appen. Eg har høyrt fantastiske historier om korleis Postkassetrimmen har ført til motivasjon og helsevinstar, skriv Byrkjeland.

Ifylgje han har mange gått turar kvar dag i eit heilt år for å få dei gjævaste bragdene i appen. Ein av dei mest aktive brukarane i Kvam er Randi Irene Aalvik. Tal frå 14. oktober synte at ho hadde totalt 8.265 innsjekkingar. Ho lasta ned appen våren 2018, og har gått mang ein tur etter det.

– Eg var ikkje like aktiv før. Det vart kjekkare å gå på tur. Og så er det moro å sjå kor andre har gått, seier Aalvik.

– Eg er litt hekta. Eg må ut kvar dag, seier ho.

Aalvik tykkjer det er trasig at appen vert lagt ned. Ho hadde mål om å gå mange nye stader. Det kan sjølvsagt gjennomførast uansett, men det er noko med innsjekkinga, fortel ho.

Ingen nye turmål

Å driva appen handlar ikkje berre om å handsama turforslag og svara på e-postar, opplyser Byrkjeland. Kodar for app og server lyt haldast ved like, og krav frå Apple og Google må stettast. Dette kjem i tillegg til å driva sjølve føretaket, og å sikra god informasjonstryggleik, skriv han.

– Som brukar av Postkassetrimmen legg ein igjen geografiske spor og andre persondata, og det er strenge lovkrav til dette. Det krev tid og arbeid å forvalta dette ansvaret på ein god måte.

Appen vil fungera som normalt fram til våren eller sommaren neste år. Nett kva tid appen forsvinn, er førebels uvisst. Turmål som allereie er registrerte i appen, vil framleis vera der, men ingen nye turmål vert lagde til.

Ein ny funksjon gjer at brukarane no kan lasta ned alle innsjekkingar og bilete, og såleis ta vare på det sjølv om appen forsvinn.

Å selja eller gje appen vidare til andre drivarar har ikkje vore aktuelt, opplyser gründeren. Ein slik operasjon er ikkje enkel å gjennomføra, og dessutan er Postkassetrimmen hjartebarnet hans, skriv han.

– Og eg må ærleg seia at det ville vore vanskeleg å gje det frå seg.

– Eg er utruleg stolt over å ha laga Postkassetrimmen og har sett kor mykje glede det har skapa. Eg håpar turgleda består. Fjella kjem i alle fall til å stå! skriv han til brukarane.