Politiet uroa over butikknasking
Foreldre må snakka med borna sine for å stoppa problemet med nasking frå butikkar, seier politistasjonssjef Terje Sperrevik ved Kvam politistasjon.
Han fortel at politiet av og til får meldingar om at unge har stole i samband med bruk av sjølvbetente kassar i butikkar. Han er redd problemet er større enn det politiet registrerer.
– Truleg er det ein del nasking butikkane ikkje melder frå om. Me er uroa for at det skal utvikla seg til eit større problem, som det verkar å vera i meir sentrale strok, og ynskjer å stoppa problemet før det eskalerer, seier Sperrevik.
Annonse
Han oppmodar foreldre om å ta ein prat med borna om at ein må betala for alle varer, også i sjølvbetente kassar. Plutseleg kan borna stå i ein situasjon der dei vert tekne for å stela, og det kan ein kanskje førebyggja ved å ta det opp med ungdomane, seier Sperrevik.
