Politiet: — Har funne ein av dei sakna
Ein av dei tre sakna vart funnen i Tokagjelet og henta opp laurdag.
Det opplyser Vest politidistrikt på ein pressekonferanse laurdag klokka 18.30. Funnet vart gjort midt på dagen. Vedkomande vart oppdaga med hjelp av bilete tekne med drone.
Mannskap frå Kvam brann og redning og Bergen brannvesen tok seg ned til personen i Tokagjelselva og konstaterte at vedkomande var død. Lekamen vart sidan henta opp og send til obduksjon i Bergen.
Politiet har all grunn til å tru at vedkomande er ein av dei tre som er sakna, opplyser innsatsleiar Svein Valland Laupsa i Vest politidistrikt.
Funnet vart gjort i den øvste delen av gjelet. Det er ikkje funne nye gjenstandar eller gjort observasjonar som tilseier kvar dei to andre sakna kan vera lokaliserte, men hovudteorien er framleis at dei ligg ein stad i den øvre delen av gjelet. Politiet utelukkar likevel ikkje at dei kan liggja lenger nede i vassdraget.
Betre tilhøve
Søket held fram, og betre vêrvarsel tyder på at ein får betre tilhøve for å søkja. Leitinga vert avslutta med dagslyset i kveld, men held sundag fram med i alle fall overflate- og strandsøk i Movatnet og fjorden, pluss nye søk med drone i Tokagjelet. Politiet vil vurdera fortløpande kva tiltak som vert naudsynte.
Mindre vassføring i elva gjer det både tryggare å ferdast ved elva og enklare å sjå, påpeikar Laupsa. Bakgrunnen for at ein fyrst og fremst nyttar drone, er risikoen med å ferdast i området.
Det var sundag kveld ein båt med tre personar truleg vart teken av straumen i Langvotnevatnet og fall ned i Tokagjelet. Dei sakna er Ruth Wathne (68), Nils Johan Bårdsen (72) og Kjell Arne Pedersen (64), alle frå Askøy.
Dei pårørande er laurdag varsla om funnet. Det er enno ikkje kjent kven som er funnen.
— Uvurderleg innsats
— Tankane mine går fyrst og fremst til dei pårørande, og Kvam herad vil uttrykkja stor medkjensle til dei i denne vanskelege tida, seier ordførar Torgeir Næss (Ap) i ei pressemelding.
Han er letta over at leitinga har gjeve resultat, og vonar dei to andre vert funne snart.
Han takkar leitemannskapa og frivillige for uvurderleg innsats i leiteaksjonen.
