Politiet etterforskar fleire innbrot: – Ein person er mistenkt

Natt til onsdag fekk politiet melding om eit innbrot i ei verksemd i sentrum. Det opplyser politioverbetjent Andor Helgheim ved Kvam politistasjon.

Nokon skal ha brote seg inn i butikken til Galleri Iversen, midt i sentrum. Då HF var på staden onsdag morgon, var handverkarar frå Botnen Entreprenør AS på plass for å ordna opp.

Helgheim opplyser at etterforskinga har leia fram til ein person som er mistenkt i fleire av sakene. Gjerningspersonen skal i hovudsak ha vore ute etter kontantar. Ifylgje politioverbetjenten er ikkje denne typen tjuveri så vanleg meir.

Hendinga natt til onsdag skal vera den fjerde i området på få dagar, fortel Helgheim. Alle innbrota skal ha skjedd midt på natta.

– Skapar uvisse

Tre av dei fire verksemdene nyttar alarmanlegg frå Kvam Security. Dagleg leiar i verksemda, Morten Garen, fortel at sikringssystemet viser at gjerningspersonen har vore inne i lokala i svært kort tid. Episodane skal ha skjedd på same tidspunkt, og dei skal ha hatt same «modus», seier han.

I dei tre tilfella Garen kjenner til, skal tilsette i vaktselskapet har rykt ut og vore på staden mellom fem og ti minutt etter at alarmen vart utløyst, forklarar han. Trass i den raske utrykkingstida er det vanskeleg å hindra ein gjerningsmann i å stela pengar.

– Kontantar er alltid sårbart. Det beste er å tøma apparata for pengar og lata dei stå opne, seier Garen.

Ifylgje Garen har gjerningspersonen vore rask inn og ut av lokala. Verksemder som er sikra med alarm, fører til at det er avgrensa kva ein innbrotstjuv kan ta seg tid til. Ein person kan ta seg langt betre tid når lokala ikkje er sikra, understrekar han.

Han fortel at han tykkjer situasjonen er veldig uheldig for dei som er råka.

– Det er «bale» når sånt skjer. Det er kostbart og skapar både uvisse og frustrasjon.

– Fylg med!

Garen seier han trur at det er store sjansar for at det vil skje fleire innbrot fram til personen vert pågripen. Difor vil vaktselskapet styrkja beredskapen om natta, fortel han.

Også politiet seier at det kan skje fleire innbrot. Helgheim ber folk om å vera observante.

– Når det har vore såpass mange på få dagar, er det ikkje sikkert at det er slutt, fortel han.

Særleg næringsdrivande bør vera påpasselege, seier han. Dei bør sjekka at alarmar og overvakingsutstyr fungerer, og sjå til at det ikkje er vekslepengar i kassen etter stengjetid.