Politiet: – Bruk refleks!

Tysdag kveld fekk politiet melding om ein fotgjengar som var vanskeleg å sjå ved Tokagjelet, fortel politioverbetjent Ann-May Garen i Kvam, Samnanger, Fusa og Tysnes lensmannsdistrikt.

Fotgjengaren var kledd i mørke klede og nytta ikkje refleks.

– Det er ikkje ulovleg å ikkje bruka refleks, men det er ein risikosport på denne tida av året. Våte haustkveldar er svært mørke. Skjer det ei ulukke, kan konsekvensane verta store både for fotgjengar og bilførar. Politiet vil på det sterkaste oppmoda alle om å henta fram refleksane, seier Garen.

Garen seier at ein liten refleks er betre enn ingen refleks, men tryggast er det dersom fotgjengarane har på seg refleksvestar.

– Eg vil òg minna folk om at ein refleksvest som har vore vaska mange gonger, ikkje er like god som ein ny vest, seier ho.