Polemikk og estetikk i alkoholpolitikk
KrF ynskte ikkje å gje skjenkjeløyve til den nye, Japan-inspirerte restauranten i Norheimsund.
Jostein Moldsvor (KrF) viste til alkohol har negative helseeffektar då formannskapet drøfta saka 25. januar. Han ynskte primært å seia nei til skjenkjeløyvet til serveringsstaden Uni Izakaya ved torget, men føreslo i staden å nekta søkjar Barmen AS løyve i det kommunale uteområdet – og såleis berre gje løyve til skjenking innandørs. Ingen andre parti støtta det.
Arne Sandven (H), tidlegare KrF-representant, har sans for at KrF er frampå og fylgjer med, men har tru på at uteserveringa vert uproblematisk og at ho er naudsynt for god drift av restauranten.
Geir Madsen (SV) ynskjer aktivitet og liv i sentrum velkome, men undra om det kan vera naudsynt å opna for skjenking utandørs heilt til klokka 02. Det hadde halde til midnatt, truleg utan at det vil råka drifta, sa han, utan å føreslå ei avgrensing.
I tillegg føreslo Madsen å krevja mellom anna at uteområdet kan formast med meir permanent karakter og med god arkitektonisk utforming. Målet hans var å hindra enkle og lite lekre installasjonar og møblar.
– Smaken er som baken, sa Gry M. Kyrkjeeide (Frp), som tok til motmæle.
Berre KrF gav SV støtte til estetikkoppmodinga.
Heradsstyret avgjer saka 1. februar.
